കൊച്ചി : കേരളത്തിൽ നിയമസഭാ തിരഞ്ഞെടുപ്പ് വിജയത്തിന് പിന്നാലെ അടുത്ത മുഖ്യമന്ത്രി ആരാകണമെന്ന ചർച്ചകൾ കൊഴുക്കുമ്പോൾ, പ്രതിപക്ഷ നേതാവ് വി.ഡി. സതീശന് പരസ്യ പിന്തുണയുമായി നടൻ സിദ്ദിഖ്. സതീശനെ അല്ലാതെ രാഹുൽ ഗാന്ധിയെപ്പോലും ആ സ്ഥാനത്ത് സങ്കൽപ്പിക്കാൻ തങ്ങൾക്ക് കഴിയില്ലെന്ന് സിദ്ദിഖ് ഫെയ്സ്ബുക്ക് കുറിപ്പിലൂടെ വ്യക്തമാക്കി. കോൺഗ്രസ് ഹൈക്കമാൻഡിനെ അഭിസംബോധന ചെയ്തുകൊണ്ടാണ് തന്റെ നിലപാട് സിദ്ദിഖ് തുറന്നുപറഞ്ഞത്.
ഈ തിരഞ്ഞെടുപ്പിൽ യുഡിഎഫിനുണ്ടായ ഉജ്ജ്വല വിജയത്തിന് പിന്നിൽ സതീശൻ എന്ന കരുത്തനായ നേതാവിനോടുള്ള ജനങ്ങളുടെ വിശ്വാസമുണ്ടെന്ന് സിദ്ദിഖ് ചൂണ്ടിക്കാട്ടുന്നു. നൂറിലധികം സീറ്റുകൾ നേടി ഭരണം പിടിക്കുമെന്നും ഇല്ലെങ്കിൽ രാഷ്ട്രീയ വനവാസത്തിന് പോകുമെന്നും ചങ്കുറപ്പോടെ പ്രഖ്യാപിച്ച ഏക നേതാവാണ് അദ്ദേഹമെന്ന് സിദ്ദിഖ് ഓർമ്മിപ്പിച്ചു. പിണറായി സർക്കാരിന്റെ ജനവിരുദ്ധ നിലപാടുകളോടുള്ള എതിർപ്പ് മാത്രമല്ല, സതീശന്റെ നേതൃപാടവവും ഈ വിജയത്തിന് അടിത്തറയിട്ടുവെന്ന് അദ്ദേഹം കുറിച്ചു.
സാമുദായിക നേതാക്കളുടെ തിണ്ണനിരങ്ങാത്ത, ഭീഷണികൾക്ക് വഴങ്ങാത്ത, മതനിരപേക്ഷത ഉയർത്തിപ്പിടിക്കുന്ന നേതാവാണ് വി.ഡി. സതീശൻ എന്നതാണ് അദ്ദേഹത്തിന്റെ പ്രത്യേകതയായി സിദ്ദിഖ് ഉയർത്തിക്കാട്ടുന്നത്. അധികാര വടംവലികൾക്കിടയിൽ ഗ്രൂപ്പ് കളിച്ചോ കുതികാൽ വെട്ടിയോ മറ്റാരെങ്കിലും മുഖ്യമന്ത്രി സ്ഥാനത്തേക്ക് വന്നാൽ അത് ജനങ്ങൾ സഹിക്കില്ലെന്നും അദ്ദേഹം മുന്നറിയിപ്പ് നൽകി. “V D സതീശൻ എന്ന ഒരേ ഒരു നേതാവിനെ അല്ലാതെ മറ്റൊരാളെ ആ പദവിയിൽ കാണാൻ ഞങ്ങൾക്ക് ആവില്ല,” സിദ്ദിഖ് വ്യക്തമാക്കുന്നു.
കോൺഗ്രസ് നേതൃത്വം പ്രാദേശിക നേതാക്കളുടെ അഭിപ്രായം മാത്രം കേൾക്കാതെ ജനങ്ങളുടെ ആഗ്രഹം കൂടി പരിഗണിക്കണമെന്ന് സിദ്ദിഖ് അപേക്ഷിച്ചു. കെ. കരുണാകരനെയും ഉമ്മൻ ചാണ്ടിയെയും ഹൃദയത്തിൽ സൂക്ഷിക്കുന്ന ഒരു സാധാരണ കോൺഗ്രസുകാരന്റെ കൈകൂപ്പിയുള്ള അപേക്ഷയാണിതെന്നും, തെറ്റായ തീരുമാനമുണ്ടായാൽ വലിയ തിരിച്ചടി നേരിടേണ്ടി വരുമെന്നും അദ്ദേഹം കുറിപ്പിൽ കൂട്ടിച്ചേർത്തു. സോഷ്യൽ മീഡിയയിൽ വലിയ ചർച്ചകൾക്കാണ് സിദ്ദിഖിന്റെ ഈ പ്രതികരണം വഴിതുറന്നിരിക്കുന്നത്.
