ഡബ്ലിൻ: നാലാം ശനിയാഴ്ചകളിൽ ഡബ്ലിനിൽ നടന്നുവരുന്ന അഭിഷേകാഗ്നി ബൈബിൾ കൺവൻഷൻ (മലയാളം) ശനിയാഴ്ച ബ്യൂമൗണ്ടിലെ ബ്ലെസഡ് മാർഗരറ്റ് ബോൾ ദേവാലയത്തിൽ രാവിലെ 11 മുതൽ വൈകുന്നേരം 4.30 വരെ നടക്കും. ഫാ. സേവ്യർ ഖാൻ വട്ടായിലിലൂടെ പരിശുദ്ധാത്മാവിന്റെ പ്രേരണയിൽ രൂപം കൊണ്ട അഭിഷേകാഗ്നി കാതോലിക് മിനിസ്ട്രി (എഎഫ്സിഎം) ആണ് ഡബ്ലിനിലെ ബൈബിൾ കൺവൻഷന് നേതൃത്വം നൽകുന്നത്. അനേകരുടെ ജീവിതത്തിൽ വിശ്വാസവളർച്ചയ്ക്കും ദൈവിക ഇടപെടലുകൾക്കും വഴിയൊരുക്കിയ എഎഫ്സിഎമ്മിന്റെ നേതൃത്വത്തിൽ നടക്കുന്ന ഈ കൺവൻഷനിൽ വിവിധ ആത്മീയ ശുശ്രൂഷകൾ ഉണ്ടായിരിക്കും. വിശുദ്ധ ബലി, ദിവ്യകാരുണ്യ ആരാധന, വിശുദ്ധ കുമ്പസാരം, വചന ശുശ്രൂഷ, സ്തുതിയാരാധന എന്നിവ കൺവൻഷന്റെ ഭാഗമായി നടക്കും. എല്ലാ വിശ്വാസികളെയും കൺവെൻഷനിലേക്ക് എഎഫ്സിഎം അയർലൻഡ് സ്വാഗതം ചെയ്യുന്നു.
