തിരുവനന്തപുരം: യുഡിഎഫ് സര്ക്കാരിന്റെ ജനപ്രിയ പദ്ധതികളിലൊന്നായ പ്രിയദര്ശിനി സ്ത്രീ സൗജന്യ യാത്രയ്ക്ക് ഇന്ന് 100 ദിനം. വനിതകള്ക്കും ട്രാന്സ്ജെന്ഡറുകള്ക്കും കെഎസ്ആര്ടിസി ബസുകളില് സൗജന്യ യാത്ര ലഭിച്ചതോടെ സ്ത്രീ ശാക്തീകരണ വഴിയിലെ ചരിത്രപരമായ അടയാളപ്പെടുത്തലായി പദ്ധതി മാറിയിട്ടുണ്ട്. ഇക്കാലയളവില് സംസ്ഥാനത്ത് സ്ത്രീ യാത്രക്കാരുടെ എണ്ണത്തില് 60 ശതമാനത്തോളം വര്ധനവ് ഉണ്ടായതായാണ് കണക്കാക്കുന്നത്. ദൈനംദിനം തൊഴിലിടങ്ങളിലേക്കു പോകുന്ന സ്ത്രീകള്ക്കും വിവിധ ആവശ്യങ്ങള്ക്കായി യാത്ര ചെയ്യേണ്ടി വരുന്നവര്ക്കുമെല്ലാം പ്രതിമാസ ചെലവില് നല്ലൊരു തുക ലാഭിക്കുന്നതിനു പ്രിയദര്ശിനി പദ്ധതി കാരണമായിട്ടുണ്ട്.
കഴിഞ്ഞ ജൂണ് 15ന് ആണ് പദ്ധതിക്കു തുടക്കമായത്. പ്രിയദര്ശിനി സൗജന്യ യാത്രാ പദ്ധതിയുടെ ആദ്യദിനം യാത്ര ചെയ്തത് 13 ലക്ഷത്തിലധികം സ്ത്രീകളായിരുന്നു. പ്രിയദര്ശിനി സൗജന്യ യാത്രാ പദ്ധതി ആരംഭിച്ച ശേഷം കെഎസ്ആര്ടിസിയുടെ കീഴില് സര്വീസ് നടത്തുന്ന ഓര്ഡിനറി ബസുകളെ ആശ്രയിക്കുന്ന യാത്രക്കാരുടെ എണ്ണത്തില് 50 ശതമാനത്തിലേറെ വര്ധനയുണ്ടായതായാണ് സ്വകാര്യ ബസുകളുടെ പ്രതിസന്ധി പഠിക്കാന് നിയോഗിച്ച വിദഗ്ധ സമിതിയുടെ കണ്ടെത്തല്. പ്രൈവറ്റ് ബസുകളില് യാത്ര ചെയ്തിരുന്നവരും പുതുതായുള്ള യാത്രക്കാരും ഇതില് ഉള്പ്പെടും.സംസ്ഥാനത്ത് 3125 ഓര്ഡിനറി ബസുകളിലാണ് നിലവില് സൗജന്യ യാത്രയുള്ളത്. പ്രതിദിനം ആകെ യാത്രക്കാരുടെ എണ്ണം 18 ലക്ഷം ആയിരുന്നത് പ്രിയദര്ശിനി പദ്ധതി വന്നതോടെ ശരാശരി 22 ലക്ഷമായി ഉയര്ന്നു. ഓര്ഡിനറി ബസുകളെല്ലാം ഇപ്പോള് നിറഞ്ഞു കവിഞ്ഞാണ് ഓടുന്നത്. 2025 ജൂണ് 15 മുതല് ജൂലൈ 14 വരെ കെഎസ്ആര്ടിസി ഓര്ഡിനറി ബസുകളിലെ യാത്രക്കാര് 3.83 കോടി ആയിരുന്നത് പദ്ധതി നടപ്പാക്കിയ ശേഷമുള്ള 2026 ജൂണ് 15-ജൂലൈ 14 കാലയളവില് 5.75 കോടിയായി ഉയര്ന്നു. ഒരു സൗജന്യ യാത്രയുടെ ശരാശരി മൂല്യം 21.33 രൂപയായാണ് കണക്കാക്കുന്നത്.
