നൈജീരിയ: വടക്കുകിഴക്കന് നൈജീരിയയിലെ ആഡമാവ സംസ്ഥാനത്ത് ഫുട്ബോള് മൈതാനത്തുണ്ടായ ഭീകരാക്രമണത്തില് 29 പേര് കൊല്ലപ്പെട്ടു. ഞായറാഴ്ച വൈകുന്നേരം ഗോംബി ലോക്കല് ഗവണ്മെന്റ് ഏരിയയിലെ ഗുയാകു ഗ്രാമത്തിലാണ് സംഭവം. കൊല്ലപ്പെട്ടവരില് ഭൂരിഭാഗവും ഫുട്ബോള് മത്സരവും കളി കാണാനുമെത്തിയ യുവാക്കളാണെന്ന് പ്രാദേശിക മാധ്യമങ്ങള് റിപ്പോര്ട്ട് ചെയ്തു. ആക്രമണത്തിന് ശേഷം ഗ്രാമത്തിലെ ആരാധനാലയങ്ങളും വീടുകളും നൂറോളം മോട്ടോര് സൈക്കിളുകളും ഭീകരര് അഗ്നിക്കിരയാക്കി. ഇതിന്റെ ദൃശ്യങ്ങള് പ്രാദേശിക ടെലിവിഷന് ചാനലുകള് പുറത്തുവിട്ടിട്ടുണ്ട്. ഉത്തരവാദിത്തം: ആക്രമണത്തിന് പിന്നില് ബോക്കോ ഹറാം തീവ്രവാദികളാണെന്ന് ഗവര്ണര് അഹ്മദു ഉമാരു ഫിന്റിരി ആരോപിച്ചു. എന്നാല്, ഐസിസ് അനുകൂല സംഘടനയായ ഇസ്ലാമിക് സ്റ്റേറ്റ് വെസ്റ്റ് ആഫ്രിക്ക പ്രൊവിന്സ് ആക്രമണത്തിന്റെ ഉത്തരവാദിത്തം ഏറ്റെടുത്ത് രംഗത്തെത്തിയിട്ടുണ്ട്. വരാനിരിക്കുന്ന പൊതുതിരഞ്ഞെടുപ്പിന് മാസങ്ങള് മാത്രം ബാക്കിനില്ക്കെ രാജ്യത്തുണ്ടാകുന്ന ഇത്തരം സുരക്ഷാ വീഴ്ചകള് നൈജീരിയന് സര്ക്കാരിനെ കടുത്ത പ്രതിരോധത്തിലാക്കിയിരിക്കുകയാണ്. 2009-ല് ആരംഭിച്ച ബോക്കോ ഹറാം പ്രക്ഷോഭത്തെ തുടര്ന്ന് നൈജീരിയയില് ഇതുവരെ പതിനായിരക്കണക്കിന് ആളുകള് കൊല്ലപ്പെടുകയും ദശലക്ഷക്കണക്കിന് ആളുകള് പലായനം ചെയ്യേണ്ടതായും വന്നിട്ടുണ്ടെന്നാണ് ഐക്യരാഷ്ട്രസഭയുടെ കണക്കുകള് സൂചിപ്പിക്കുന്നത്. പ്രദേശത്തെ ജിഹാദി ഗ്രൂപ്പുകളെ അടിച്ചമര്ത്താന് അമേരിക്കയുടെ സാങ്കേതിക സഹായവും പരിശീലനവും തേടാനുള്ള ഒരുക്കത്തിലാണ് നിലവില് നൈജീരിയന് സൈന്യം.
