ഇറാനും ഇസ്രായേലും തമ്മിലുള്ള സംഘർഷം നാലാം ദിവസവും തുടരുകയാണ്. ഇരു രാജ്യങ്ങളും പരസ്പരം നടത്തുന്ന ആക്രമണങ്ങളിൽ നൂറുകണക്കിന് ആളുകൾക്ക് ജീവൻ നഷ്ടപ്പെടുകയും പരിക്കേൽക്കുകയും ചെയ്തു. തിങ്കളാഴ്ച പുലർച്ചെയുണ്ടായ ഇറാനിയൻ മിസൈൽ ആക്രമണങ്ങളിൽ ഇസ്രായേലിൽ കനത്ത നാശനഷ്ടമുണ്ടായി. ഹൈഫയിലെ ഒരു പവർ പ്ലാന്റിൽ തീപിടിത്തമുണ്ടായതായി ബ്രിട്ടീഷ് മാരിടൈം സെക്യൂരിറ്റി സ്ഥാപനമായ ആംബ്രേ റിപ്പോർട്ട് ചെയ്തു. ഈ ആക്രമണങ്ങളിൽ ഇസ്രായേലിൽ മൂന്ന് പേർ കൊല്ലപ്പെടുകയും ഡസൻ കണക്കിന് ആളുകൾക്ക് പരിക്കേൽക്കുകയും ചെയ്തതായി ഇസ്രായേലി മാധ്യമങ്ങൾ അറിയിച്ചു. ഹൈപ്പർസോണിക് മിസൈലുകൾ ഉപയോഗിച്ചാണ് ഈ ആക്രമണം നടന്നതെന്നും റിപ്പോർട്ടുണ്ട്. ഇസ്രായേലിന്റെ ആക്രമണങ്ങളിൽ ഇറാനിൽ വലിയ ആൾനാശമാണ് രേഖപ്പെടുത്തിയിരിക്കുന്നത്. ഇതുവരെ 224 പേർ കൊല്ലപ്പെട്ടതായും, അതിൽ 90% സാധാരണക്കാരാണെന്നും ഇറാൻ ആരോഗ്യ മന്ത്രാലയ വക്താവ് പറഞ്ഞു. ടെഹ്റാനിലെ റെസിഡൻഷ്യൽ ഏരിയകളിൽ നിരവധി സ്ത്രീകളും കുട്ടികളും കൊല്ലപ്പെട്ടതായി ഇറാൻ വിദേശകാര്യ മന്ത്രാലയം ആരോപിച്ചു. ഇതിനിടെ, ഇറാൻ റെവല്യൂഷണറി ഗാർഡ്സ് ഇന്റലിജൻസ് മേധാവി മുഹമ്മദ് കാസെമിയും അദ്ദേഹത്തിന്റെ ഡെപ്യൂട്ടിയും ഇസ്രായേൽ ആക്രമണത്തിൽ കൊല്ലപ്പെട്ടതായും താൻ തന്നെയാണ് ഇവരെ വധിച്ചതെന്ന് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു സ്ഥിരീകരിക്കുകയും ചെയ്തു.
അതിനിടെ, യു.എസ്. പ്രസിഡന്റ് ഡൊണാൾഡ് ട്രംപ് ഇറാൻ-ഇസ്രായേൽ സംഘർഷത്തിൽ സമാധാന പ്രതീക്ഷ പ്രകടിപ്പിച്ചു. ഇരു രാജ്യങ്ങളും ഒരു കരാറിൽ എത്തുമെന്നും ഉടൻ സമാധാനം ഉണ്ടാകുമെന്നും അദ്ദേഹം ട്രൂത്ത് സോഷ്യലിൽ കുറിച്ചു. ഇറാനിയൻ പരമോന്നത നേതാവ് ആയത്തുല്ല അലി ഖമേനിയെ വധിക്കാനുള്ള ഇസ്രായേൽ പദ്ധതി ട്രംപ് വീറ്റോ ചെയ്തതായും റിപ്പോർട്ടുകളുണ്ട്. ഇറാൻ സുരക്ഷാ സേന, ടെഹ്റാന് തെക്ക് ഷഹ്ർ-ഇ റേയിൽ ഒരു രഹസ്യ ഡ്രോൺ നിർമ്മാണ കേന്ദ്രം കണ്ടെത്തിയതായും റിപ്പോർട്ടുകൾ പറഞ്ഞു . ഇസ്രായേലി ഏജന്റുമാർ ഡ്രോണുകൾ നിർമ്മിക്കാനും സൂക്ഷിക്കാനും ഈ കേന്ദ്രം ഉപയോഗിച്ചിരുന്നതായാണ് ആരോപണം. അന്താരാഷ്ട്ര തലത്തിൽ ഈ സംഘർഷം വലിയ ആശങ്കയാണ് ഉയർത്തുന്നത്. കാനഡയിൽ നടക്കുന്ന G7 രാജ്യങ്ങളുടെ ഉച്ചകോടിയിൽ ഇറാൻ-ഇസ്രായേൽ സംഘർഷം പ്രധാന ചർച്ചാവിഷയമാകും. യൂറോപ്യൻ യൂണിയൻ വിദേശകാര്യ മന്ത്രിമാരുടെ ഒരു വീഡിയോ കോൺഫറൻസ് ചൊവ്വാഴ്ച നടക്കുമെന്ന് യൂറോപ്യൻ യൂണിയൻ അറിയിച്ചു. നിലവിലെ സ്ഥിതിഗതികൾ ചർച്ച ചെയ്യാനും നയതന്ത്രപരമായ നീക്കങ്ങൾ ഏകോപിപ്പിക്കാനുമാണ് ഈ യോഗം ലക്ഷ്യമിടുന്നത്.
