മണിപ്പൂരില് നടക്കുന്നത് വംശഹത്യയെന്ന് ആര്ച്ച് ബിഷപ്പ് ജോസഫ് പാംപ്ലാനി. കലാപം തടയുന്നതില് കേന്ദ്ര-സംസ്ഥാന സര്ക്കാരുകള് പരാജയപ്പെട്ടു എന്നും കലാപം പടര്ന്നത് ക്രൈസ്തവ പള്ളികള് ലക്ഷ്യമിട്ടാണെന്നും ജോസഫ് പാംപ്ലാനി പറഞ്ഞു. പ്രധാനമന്ത്രി അമേരിക്കയില് പോയി യാതൊരു വിവേചനവും നടക്കുന്നില്ലെന്ന് പറയുന്നു എന്നാല് ഇക്കാര്യം മണിപ്പൂരിലെ ക്രൈസ്തവരോട് പ്രധാനമന്ത്രിക്ക് പറയാനാകുമോ എന്ന് ജോസഫ് പാംപ്ലാനി ചോദിച്ചു. മറ്റിടങ്ങളിലും ന്യൂനപക്ഷ വേട്ട നടക്കുന്നു എന്നും മണിപ്പൂരിലേത് ഭരണകൂടം സ്പോണ്സര് ചെയ്ത കലാപം ആണെന്നും ജോസഫ് പാംപ്ലാനി പറഞ്ഞു.
അതേസമയം കേന്ദ്രസര്ക്കാര് റബ്ബര് വില 300 രൂപയായി പ്രഖ്യാപിച്ചാല് ബിജെപിയെ സഹായിക്കുമെന്ന് തലശ്ശേരി അതിരൂപതാ ആര്ച്ച് ബിഷപ്പ് മാര് ജോസഫ് പാംപ്ലാനി ഇതിനു മുൻപ് പറഞ്ഞിരുന്നു. കത്തോലിക്കാ കോണ്ഗ്രസിന്റെ നേതൃത്വത്തില് കണ്ണൂര് ആലക്കോട് സംഘടിപ്പിച്ച കര്ഷക റാലിയിലായിരുന്നു തലശ്ശേരി ബിഷപ്പിന്റെ വിവാദ പ്രസംഗം. റബ്ബര് കര്ഷകരെ സഹായിച്ചാല് ബിജെപിയെ പിന്തുണയ്ക്കുമെന്നായിരുന്നു ബിഷപ്പിന്റെ പ്രഖ്യാപനം. കേന്ദ്ര സര്ക്കാര് റബ്ബര് വില 300 രൂപയാക്കി ഉയര്ത്തിയാല് ബിജെപിയെ സഹായിക്കുമെന്നും കേരളത്തില് ഒരു എംപി പോലുമില്ലെന്ന വിഷമം മാറ്റിത്തരാമെന്നും ബിഷപ്പ് വാഗ്ദാനം ചെയ്തിരുന്നു.
