സെൻട്രൽ കോസ്റ്റ് മലയാളി അസോസിയേഷൻ (CCMA) സംഘടിപ്പിക്കുന്ന ഈ വർഷത്തെ വിപുലമായ ഓണാഘോഷ പരിപാടിയായ “ഒരു കിടുക്കാച്ചി ഓണം 2026 ഫെസ്റ്റ്” പ്രഖ്യാപിച്ചു. ‘പൊന്നോണം തകർത്തല്ലോ… ചിരിയും കളിയും ഓർമ്മകളും’ എന്ന പ്രമേയവുമായി എത്തുന്ന ഈ ഫെസ്റ്റിൽ പരമ്പരാഗത കലാ-കായിക പരിപാടികളും വിനോദ മത്സരങ്ങളും ഉൾപ്പെടുത്തി മാസങ്ങൾ നീണ്ടുനിൽക്കുന്ന വൻ ആഘോഷങ്ങളാണ് അണിയറയിൽ ഒരുങ്ങുന്നത്.
ജൂൺ മാസം മുതൽ വിവിധയിടങ്ങളിലായി മത്സരങ്ങൾ ആരംഭിക്കും. ജൂൺ 6-ാം തീയതി വൈകുന്നേരം 5:00 മണി മുതൽ രാത്രി 10:00 മണി വരെ വാർണവാലിൽ (Warnevale) പുരുഷന്മാർക്കായി ‘റമ്മി’ (Rummy) മത്സരവും, സ്ത്രീകൾക്കായി ’28 ചീട്ടുകളി / റമ്മി’ മത്സരങ്ങളും നടക്കും. തുടർന്ന് ജൂൺ 20-ാം തീയതി ഇതേ സമയത്ത് പുരുഷന്മാർക്കായുള്ള ’40 ചീട്ടുകളി’ മത്സരവും വാർണവാലിൽ വെച്ച് അരങ്ങേറും.
ജൂലൈ 18-ാം തീയതി രാവിലെ 9:30 മുതൽ വൈകുന്നേരം 6:00 മണി വരെ വാർണവാലിൽ വെച്ച് ‘ഔട്ട്ഡോർ ഗെയിംസും ഫാമിലി ഫൺ ഡേയും’ (Outdoor Games & Family Fun Day) സംഘടിപ്പിച്ചിട്ടുണ്ട്. ഇൻഡോർ ഗെയിംസുകളും ഇതിന്റെ ഭാഗമായി ഉണ്ടായിരിക്കും. കൂടാതെ ഓഗസ്റ്റ് 8-ാം തീയതി രാവിലെ 10:00 മണി മുതൽ ‘ബാഡ്മിന്റൺ’ (Badminton) മത്സരങ്ങളും നടക്കും; ഇതിന്റെ വേദി പിന്നീട് പ്രഖ്യാപിക്കുന്നതാണ്. ഈ വർഷത്തെ ഓണം ഫെസ്റ്റിന്റെ പ്രധാന ആകർഷണങ്ങളായി (Highlights) പ്രശസ്ത വ്യക്തികളെയും സിനിമാ കഥാപാത്രങ്ങളെയും അനുകരിക്കുന്ന ‘ക്യാരക്ടർ കോംപറ്റീഷൻ’, നാവിൻ തുമ്പിൽ മധുരമൂറുന്ന ‘പായസം മേള’, മലയാളികളുടെ പ്രിയപ്പെട്ട ‘വടംവലി’, ആവേശകരമായപഞ്ചഗുസ്തി (Arm Wrestling) എന്നിവയും ഉൾപ്പെടുത്തിയിട്ടുണ്ട്.
ജാതിമത ഭേദമന്യേ സെൻട്രൽ കോസ്റ്റിലെ മുഴുവൻ മലയാളികളെയും ഒരുമിച്ച് ചേർത്തുകൊണ്ട് ഓണാഘോഷം അവിസ്മരണീയമാക്കാനുള്ള ഒരുക്കത്തിലാണ് അസോസിയേഷൻ ഭാരവാഹികൾ.
