ഡ്രൈവിംഗ് ലൈസൻസ് നേടാനുള്ള നെട്ടോട്ടത്തിനിടയിലും ഒരു മനുഷ്യജീവൻ രക്ഷിക്കാൻ മനസ്സാന്നിധ്യം കാണിച്ച ലിയ എലിസബത്ത് എന്ന യുവതി ഇപ്പോൾ ലിവർപൂളിലെ താരമാണ്. ചൊവ്വാഴ്ച രാവിലെ നോറിസ് ഗ്രീനിലെ തിരക്കേറിയ ജംഗ്ഷനിൽ കുഴഞ്ഞുവീണ അൻപതുകാരനെയാണ് ലിയ ജീവിതത്തിലേക്ക് തിരികെ കൊണ്ടുവന്നത്. ലിവർപൂൾ ഹാർട്ട് ആൻഡ് ചെസ്റ്റ് ഹോസ്പിറ്റലിലെ ക്രിട്ടിക്കൽ കെയർ നേഴ്സായ ലിയ, തന്റെ ഡ്രൈവിംഗ് ഇൻസ്ട്രക്ടർ ലീ റെഡിനൊപ്പം പരിശീലനം നടത്തുന്നതിനിടയിലാണ് റോഡരികിൽ ഒരാൾ കുഴഞ്ഞുവീഴുന്നത് കണ്ടത്. വണ്ടി ഓടിച്ചുകൊണ്ടിരുന്ന ലിയ ഒട്ടും പരിഭ്രമിക്കാതെ കാർ നിർത്തി പുറത്തേക്കോടി. ഇൻസ്ട്രക്ടർ ഉടൻ തന്നെ ആംബുലൻസിനെ വിളിച്ചു. രോഗിയെ പരിശോധിച്ചപ്പോൾ ശ്വാസമോ പൾസോ ഇല്ലെന്ന് തിരിച്ചറിഞ്ഞ ലിയ, അയാൾക്ക് ഹൃദയസ്തംഭനം സംഭവിച്ചതാണെന്ന് ഉറപ്പിച്ചു. ഉടൻ തന്നെ അവൾ ആ മനുഷ്യന് സിപിആർ (CPR) നൽകാൻ ആരംഭിച്ചു. ആ സമയത്ത് അവിടെയുണ്ടായിരുന്ന മറ്റ് ചില വഴിയാത്രക്കാരും സഹായത്തിനെത്തി. ഇതിനിടയിൽ ഒരാൾ സമീപത്തുണ്ടായിരുന്ന പബ്ലിക് ഡിഫിബ്രിലേറ്റർ (Defibrillator) എത്തിച്ചു. ഈ രക്ഷാദൗത്യത്തിന് പിന്നിൽ ലിയയെ സംബന്ധിച്ചിടത്തോളം ഒരു വൈകാരിക വശം കൂടിയുണ്ട്. 2021 ഫെബ്രുവരിയിൽ, തന്റെ അച്ഛന്റെ ജന്മദിനത്തിൽ അദ്ദേഹം സമാനമായ രീതിയിൽ ഹൃദയസ്തംഭനം വന്ന് മരിച്ചിരുന്നു. അന്ന് ലിയ വീട്ടിലുണ്ടായിരുന്നു. അച്ഛൻ ഉറങ്ങുകയാണെന്നാണ് അവർ കരുതിയത്. പിന്നീട് നോക്കുമ്പോൾ അദ്ദേഹം തറയിൽ വീണുകിടക്കുകയായിരുന്നു. അന്ന് സിപിആർ നൽകിയെങ്കിലും അദ്ദേഹത്തെ രക്ഷിക്കാൻ കഴിഞ്ഞില്ല. “അന്ന് എനിക്ക് അച്ഛനെ രക്ഷിക്കാൻ പറ്റിയില്ല. പക്ഷേ ഇന്ന് ഈ മനുഷ്യനെ സഹായിക്കാൻ കഴിഞ്ഞപ്പോൾ ആ പഴയ വേദനയ്ക്ക് ചെറിയൊരു ആശ്വാസം ലഭിച്ചതുപോലെ തോന്നി,” ലിയ വികാരാധീനയായി പറഞ്ഞു. ആശുപത്രിയിൽ എത്തിച്ച രോഗി അടിയന്തര ശസ്ത്രക്രിയയ്ക്ക് ശേഷം ഇപ്പോൾ സുഖം പ്രാപിച്ചുവരികയാണ്. കൃത്യസമയത്ത് ലിയ അവിടെ എത്തിയത് ആ മനുഷ്യന്റെ ഭാഗ്യമാണെന്നും അല്ലെങ്കിൽ വലിയ ദുരന്തം സംഭവിക്കുമായിരുന്നു എന്നും ഇൻസ്ട്രക്ടറായ ലീ റെഡ് പറഞ്ഞു. സ്വന്തം വേദനകൾക്കിടയിലും മറ്റൊരാൾക്ക് തണലാകാൻ കഴിഞ്ഞ ലിയയെ അഭിനന്ദനങ്ങൾ കൊണ്ട് മൂടുകയാണ് ലിവർപൂൾ മലയാളികൾ.
മനോജ് ജോസഫ് ചെത്തിപ്പുഴ
