വടക്കുകിഴക്കൻ അമേരിക്കൻ ഐക്യനാടുകളിൽ കനത്ത മഞ്ഞുവീഴ്ച റിപ്പോർട്ട് ചെയ്തു. ഈ സീസണിലെ ആദ്യത്തെ അളക്കാവുന്ന മഞ്ഞുവീഴ്ചയാണ് ന്യൂയോർക്കിലെ സെൻട്രൽ പാർക്കിൽ രേഖപ്പെടുത്തിയത്. 2018 ന് ശേഷം ആദ്യമായാണ് നഗരത്തിൽ ഇത്രയും കനത്ത മഞ്ഞുവീഴ്ച നേരത്തെ ഉണ്ടാകുന്നത്. ശനിയാഴ്ച രാത്രി വൈകി ആരംഭിച്ച മഞ്ഞുവീഴ്ച ഞായറാഴ്ച രാവിലെ വരെ തുടർന്നു. കുന്നുകൂടിയ മഞ്ഞ് ന്യൂയോർക്ക് സിറ്റി പോലുള്ള പ്രധാന നഗര കേന്ദ്രങ്ങളിൽ ഗതാഗത തടസ്സമുണ്ടാക്കി. കൂടാതെ, റോഡുകൾ വഴുക്കലുള്ളതാവുകയും ന്യൂയോർക്ക് സിറ്റിയിൽ വിമാന സർവീസുകൾ വൈകാൻ കാരണമാവുകയും ചെയ്തു.
സെൻട്രൽ പാർക്ക് കൺസർവൻസി ജീവനക്കാർ പാതകൾ വൃത്തിയാക്കാനും പാർക്ക് സുരക്ഷിതമായി നിലനിർത്താനും ശ്രമിച്ചു. വാരാന്ത്യത്തിലെ കൊടുങ്കാറ്റിനെ തുടർന്നുണ്ടായ തണുപ്പും മഞ്ഞും കാരണം ഫിലാഡെൽഫിയയിലും മേരിലാൻഡിന്റെ ചില ഭാഗങ്ങളിലും തിങ്കളാഴ്ച (ഡിസംബർ 15) സ്കൂളുകൾ രണ്ട് മണിക്കൂർ വൈകി തുറന്നു. കാലാവസ്ഥാ പ്രശ്നങ്ങൾ കാരണം വൈകിയെത്തുന്ന വിദ്യാർത്ഥികൾക്ക് രക്ഷിതാക്കളുടെ കുറിപ്പ് നൽകിയാൽ വൈകിയതായി രേഖപ്പെടുത്തില്ലെന്നും വീട്ടിലിരിക്കുന്ന വിദ്യാർത്ഥികൾക്ക് അവധി അനുവദിക്കുമെന്നും സ്കൂൾ അധികൃതർ അറിയിച്ചു,.
