തിരൂർ: തുഞ്ചത്തെഴുത്തച്ഛൻ മലയാളം സർവകലാശാലയും ഫെഡറേഷൻ ഓഫ് കേരളാ അസോസിയേഷൻ ഇൻ നോർത്ത് അമേരിക്ക (ഫൊക്കാന)യും ചേർന്ന് അമേരിക്കൻ മലയാളികൾക്കായി ഭാഷാ-സാഹിത്യ മേഖലയിൽ പുതിയ പദ്ധതികൾക്ക് തുടക്കമിടുന്നു.
ഫൊക്കാന പ്രസിഡന്റായി തിരഞ്ഞെടുക്കപ്പെട്ട ശേഷം ഫിലിപ്പോസ് ഫിലിപ്പ് നടത്തിയ ആദ്യ കേരള സന്ദർശനത്തിനിടെയാണ് പദ്ധതിയെക്കുറിച്ചുള്ള പ്രാഥമിക ചർച്ചകൾ നടന്നത്. അമേരിക്കയിലെ മലയാളി എഴുത്തുകാർക്കും സാഹിത്യരചനയിൽ താൽപര്യമുള്ളവർക്കുമായി മലയാള ഭാഷയിലും സാഹിത്യത്തിലും സമകാലിക രചനാശൈലി പരിചയപ്പെടുത്തുന്ന സർട്ടിഫിക്കറ്റ് കോഴ്സ് ആരംഭിക്കാനാണ് ആലോചന.
ഫൊക്കാനയുടെ സഹകരണത്തോടെ പദ്ധതി നടപ്പാക്കുന്നതിന്റെ ഭാഗമായി മലയാളം സർവകലാശാല വൈസ് ചാൻസലർ ഡോ. സി. ആർ. പ്രസാദുമായി ചർച്ച നടത്തി. എഴുത്തുകാർക്ക് മാത്രമല്ല, സാഹിത്യത്തിൽ താൽപര്യമുള്ള സാധാരണക്കാർക്കും പങ്കെടുക്കാവുന്ന രീതിയിലായിരിക്കും കോഴ്സ് രൂപകൽപ്പന ചെയ്യുക.
പദ്ധതിയുടെ തുടർനടപടികൾ ഏകോപിപ്പിക്കാൻ പ്രത്യേക കമ്മിറ്റി രൂപീകരിക്കാനും, ധാരണാപത്രം 2027 ജനുവരി ആദ്യവാരം ഒപ്പുവയ്ക്കാനുമാണ് തീരുമാനം. കോഴ്സ് ഓൺലൈൻ സംവിധാനങ്ങളിലൂടെ അമേരിക്കയിലെ പഠിതാക്കൾക്ക് ലഭ്യമാക്കുന്നതിനും ചർച്ചകൾ പുരോഗമിക്കുന്നുണ്ട്.
മലയാളം സർവകലാശാല രജിസ്ട്രാർ ഇൻ ചാർജ് ഡോ. എം. ജി. മല്ലിക, ഐക്യുഎസി ഡയറക്ടർ ഡോ. ജി. സജിന, ഡോ. ആർ. വിദ്യ, ഡോ. എ. അൻവർ, എഴുത്തുകാരൻ കെ. പി. രാമനുണ്ണി, മാധ്യമ പ്രവർത്തകൻ അനിൽ പെണ്ണുക്കര, ബി. ഹരികുമാർ എന്നിവരും ചർച്ചയിൽ പങ്കെടുത്തു.
പ്രവാസ ലോകത്ത് മലയാള ഭാഷയും സാഹിത്യവും കൂടുതൽ സജീവമായി നിലനിർത്തുന്നതിനും പുതിയ തലമുറയെ എഴുത്തിലേക്കും വായനയിലേക്കും ആകർഷിക്കുന്നതിനുമുള്ള ഒരു പുതിയ ചുവടുവയ്പ്പായാണ് ഈ സംരംഭത്തെ കാണുന്നത്.
പ്രതിനിധി ചിത്രം
