ട്രംപ് ഭരണകൂടത്തിന്റെ പുതിയ താരിഫ് നിയമങ്ങളുടെ ആഘാതം ആഗോള തപാൽ സേവനങ്ങളിലും ദൃശ്യമായി. ജർമ്മനി, ഫ്രാൻസ്, ബ്രിട്ടൻ, ഇന്ത്യ, സ്പെയിൻ എന്നിവയുൾപ്പെടെ പല രാജ്യങ്ങളും അമേരിക്കയിലേക്കുള്ള പാഴ്സൽ, തപാൽ സേവനങ്ങൾ ഭാഗികമായോ പൂർണ്ണമായോ നിർത്തി വെച്ചു. 800 ഡോളറിൽ താഴെ വിലയുള്ള ഇറക്കുമതി ചെയ്ത പാക്കേജുകൾക്കുള്ള പഴയ നികുതി ഇളവ് അവസാനിപ്പിച്ചപ്പോഴാണ് രാജ്യങ്ങള് ഈ നടപടി സ്വീകരിച്ചത്. നിയമവിരുദ്ധമായ മരുന്നുകളും നിരോധിത വസ്തുക്കളും തടയുന്നതിനാണ് ഈ മാറ്റം നടപ്പിലാക്കുന്നതെന്ന് ട്രംപ് പറഞ്ഞിരുന്നതെങ്കിലും, അന്താരാഷ്ട്ര തപാൽ ഓപ്പറേറ്റർമാരും ഇ-കൊമേഴ്സ് കമ്പനികളും പറയുന്നത് ഈ പെട്ടെന്നുള്ള തീരുമാനം തങ്ങളെ കുഴപ്പത്തിലാക്കിയെന്നാണ്. നിയമങ്ങളുടെ സാങ്കേതിക വിശദാംശങ്ങൾ യുഎസ് കസ്റ്റംസ് ആൻഡ് ബോർഡർ പ്രൊട്ടക്ഷൻ ഓഗസ്റ്റ് 15 ന് മാത്രമാണ് പങ്കുവെച്ചത്, തപാൽ വകുപ്പിന് തയ്യാറെടുപ്പിനായി രണ്ടാഴ്ചയിൽ താഴെ സമയം മാത്രമേ നൽകിയിട്ടുള്ളൂ.
ഏതൊക്കെ രാജ്യങ്ങളാണ് സേവനം നിർത്തിയിരിക്കുന്നത് :
ജർമ്മനി : ഡച്ച് പോസ്റ്റും ഡിഎച്ച്എൽ പാർസലും ശനിയാഴ്ച മുതൽ എല്ലാ ബിസിനസ് പാഴ്സലുകളും നിർത്തിവച്ചു. എന്നാല്, ഡിഎച്ച്എൽ എക്സ്പ്രസ് സേവനം തുടരും.
ഫ്രാൻസ് : എത്രയും വേഗം പരിഹാരം കണ്ടെത്തിയില്ലെങ്കിൽ സേവനം പൂർണ്ണമായും നിർത്തേണ്ടിവരുമെന്ന് ലാ പോസ്റ്റെ മുന്നറിയിപ്പ് നൽകി.
യുകെ : റോയൽ മെയിൽ അടുത്തയാഴ്ച സേവനങ്ങൾ ഹ്രസ്വകാലത്തേക്ക് നിർത്തിവച്ചുകൊണ്ട് പുതിയ സംവിധാനം നടപ്പിലാക്കും.
ബെൽജിയം : ബിപോസ്റ്റ് ശനിയാഴ്ച മുതൽ സാധനങ്ങളുടെ കയറ്റുമതി നിർത്തിവച്ചു. കത്തുകൾ, രേഖകൾ, $100 വരെയുള്ള നികുതി ഇളവുള്ള സാധനങ്ങൾ എന്നിവ മാത്രമേ അയക്കുകയുള്ളൂ.
സ്പെയിൻ : തിങ്കളാഴ്ച മുതൽ 800 ഡോളർ വരെയുള്ള പാക്കേജുകൾ സ്വീകരിക്കുന്നത് കൊറിയോസ് നിർത്തി.
ഇന്ത്യ : തിങ്കളാഴ്ച മുതൽ ഇന്ത്യ പോസ്റ്റ് ഇനങ്ങൾക്കുള്ള മെയിൽ സേവനം നിർത്തി വെച്ചു. എന്നാല്, $100 വരെയുള്ള കത്തുകൾ, രേഖകൾ, സമ്മാനങ്ങൾ എന്നിവ ഇപ്പോഴും അയക്കാന് കഴിയും.
ഉപഭോക്താക്കളിൽ ആഘാതം
ഈ തീരുമാനങ്ങൾ അമേരിക്കയില് താമസിക്കുന്ന ഉപഭോക്താക്കളെ നേരിട്ടാണ് ബാധിക്കുന്നത്. ഇപ്പോൾ അവർക്ക് ഷിപ്പിംഗ് ഓപ്ഷനുകൾ കുറവായിരിക്കും, ഡെലിവറി വൈകും, അധിക ചാർജുകൾ നൽകേണ്ടിവരും. നേരത്തെ, $800 വരെയുള്ള പാക്കേജുകൾക്ക് ഡ്യൂട്ടി ഫ്രീ ആയിരുന്നു. എന്നാൽ, ഇപ്പോൾ നിയമങ്ങൾ പ്രകാരം മൂന്ന് ലെവലുകൾ നിശ്ചയിച്ചിട്ടുണ്ട്. യുഎസ് താരിഫ് 15% ൽ താഴെയുള്ള രാജ്യങ്ങളിൽ നിന്നുള്ള പാക്കേജുകൾക്ക് $80 അധിക ഡ്യൂട്ടി ഈടാക്കും. 16–25% താരിഫ് ഉള്ള രാജ്യങ്ങളിൽ നിന്നുള്ള പാക്കേജുകൾക്ക് $160 ഉം 25% ൽ കൂടുതൽ താരിഫ് ഉള്ള രാജ്യങ്ങളിൽ നിന്നുള്ള പാക്കേജുകൾക്ക് $200 വരെയും ഈടാക്കും.
കൂടാതെ, ഇനി പാക്കേജ് അയക്കുന്നതിന് മുമ്പ് ഫീസ് മുൻകൂട്ടി അടയ്ക്കേണ്ടിവരും. ഇത് അന്താരാഷ്ട്ര ഇ-കൊമേഴ്സിന്റെ ചെലവ് വർദ്ധിപ്പിക്കുകയും ചെറുകിട വ്യാപാരികളിൽ വലിയ സ്വാധീനം ചെലുത്തുകയും ചെയ്യും. $100 വരെയുള്ള കത്തുകൾ, രേഖകൾ, സമ്മാനങ്ങൾ എന്നിവ ഒഴിവാക്കിയിട്ടുണ്ടെങ്കിലും, നിയമങ്ങൾ ദുരുപയോഗം ചെയ്യപ്പെടാതിരിക്കാൻ അവയും കർശനമായി പരിശോധിക്കും.
