സൂറിച്ച് : സൂറിച്ച് ആസ്ഥാനമായി പ്രവർത്തിക്കുന്ന സ്റ്റാർട്ടപ്പായ ട്വിലൈനർ (Twiliner), സൂറിച്ചിൽ നിന്ന് ആംസ്റ്റർഡാമിലേക്കും ബാഴ്സലോണയിലേക്കും പുതിയ നൈറ്റ് ബസ് സർവീസ് പ്രഖ്യാപിച്ചു. വിമാനയാത്രയെക്കാൾ കൂടുതൽ കാലാവസ്ഥ സൗഹൃദമായ രീതിയിൽ ബിസിനസ് ക്ലാസ് നിലവാരത്തിലുള്ള യാത്രയാണ് കമ്പനി വാഗ്ദാനം ചെയ്യുന്നത്. ‘നൈറ്റ് ബസ് യാത്രയെ പുനർവിചിന്തനം ചെയ്യുക’ എന്ന ലക്ഷ്യത്തോടെയാണ് ട്വിലൈനർ പുതിയ ബസ് സർവീസ് പ്രഖ്യാപിച്ചത്. യൂറോപ്പിലെ ബസ്സുകളിൽ ആദ്യമായി, വിമാനത്തിലെ ബിസിനസ് ക്ലാസിലുള്ളതിന് സമാനമായി, കിടക്കയായി മാറ്റാൻ കഴിയുന്ന സീറ്റുകളാണ് (lie-flat bed) ട്വിലൈനർ വാഗ്ദാനം ചെയ്യുന്നത്. വിമാന സീറ്റുകൾ നിർമ്മിക്കുന്ന എയർലൈൻ സർവീസസ് ഇൻ്റീരിയറുമായി സഹകരിച്ചാണ് ഈ സീറ്റുകൾ രൂപകൽപ്പന ചെയ്തത്. രണ്ട് പോയിൻ്റ് സീറ്റ് ബെൽറ്റും ലെഗ് റിസ്ട്രെയ്ൻ്റും ഉൾപ്പെടുന്ന ഒരു സംയോജിത നിയന്ത്രണ സംവിധാനം ആവശ്യമായ സുരക്ഷ ഉറപ്പാക്കുന്നുണ്ട്.
ഈ ഡിസംബറിൽ രണ്ട് റൂട്ടുകളാണ് സൂറിച്ച് സ്റ്റാർട്ടപ്പ് കമ്പനി ആരംഭിക്കുന്നത്. ഒരു റൂട്ട് സൂറിച്ചിൽ നിന്ന് ആരംഭിച്ച് ബാസൽ, ലക്സംബർഗ്, ബ്രസ്സൽസ്, റോട്ടർഡാം എന്നിവിടങ്ങളിൽ നിർത്തി ആംസ്റ്റർഡാമിൽ അവസാനിക്കും. രണ്ടാമത്തെ റൂട്ട് സൂറിച്ചിൽ നിന്ന് ബേൺ, ജിറോണ വഴി ബാഴ്സലോണയിലേക്ക് പോകും. സ്വകാര്യ യാത്രകൾക്കായി കമ്പനികൾക്ക് ബസുകൾ വാടകയ്ക്ക് എടുക്കാനും സാധിക്കും. താൽപ്പര്യമുള്ള യാത്രക്കാർക്ക് ഒരു വശത്തേക്കുള്ള ടിക്കറ്റിന് 150 മുതൽ 250 സ്വിസ് ഫ്രാങ്ക് വരെയാണ് (ഏകദേശം 15,000 രൂപ മുതൽ 25,000 രൂപ വരെ) ചെലവ് വരികയെന്ന് വാട്സൺ റിപ്പോർട്ട് ചെയ്യുന്നു. ട്വിലൈനർ ബസ്സിൽ യാത്ര ചെയ്യുന്നത് സമാനമായ വിമാന യാത്രയേക്കാൾ 91 ശതമാനം വരെ കുറഞ്ഞ CO2 പുറന്തള്ളുന്നതിന് കാരണമാകുമെന്ന് കമ്പനി അവകാശപ്പെടുന്നു. പരമ്പരാഗത ബസ്സിൽ 80 യാത്രക്കാർക്ക് ഇരിക്കാമെങ്കിലും, ട്വിലൈനർ ബസ്സിൽ 21 യാത്രക്കാർക്ക് മാത്രമേ യാത്ര ചെയ്യാൻ സാധിക്കൂ.
