ഏറ്റുമാനൂർ: ശബരിമലയുടെ ഇടത്താവളമായ ഏറ്റുമാനൂർ ക്ഷേത്രത്തിൽ എത്തുന്ന തീർഥാടകർക്ക് സൗകര്യങ്ങളൊരുക്കി ഏറ്റുമാനൂർ നഗരസഭ. തീർഥാടകർക്ക് സൗജന്യ വൈഫൈ കണക്ഷനും മൊബൈൽ ചാർജിംഗ് യൂണിറ്റുകളും ക്രമീകരിച്ചു. തീർഥാടകർക്കായുള്ള സേവനങ്ങൾ മെച്ചപ്പെടുത്തുന്നതിന്റെ ഭാഗമായി അവരുടെ അഭിപ്രായങ്ങൾ രേഖപ്പെടുത്തുന്നതിന് ക്യുആർ കോഡ് സംവിധാനം ഏർപ്പെടുത്തിയിട്ടുണ്ട്. തീർഥാടകരെ വരവേൽക്കാൻ നഗരസഭയുടെ ഭാഗത്തുനിന്നുള്ള ഒരുക്കങ്ങൾ പൂർത്തിയായതായി നഗരസഭാ ചെയർമാൻ ടോമി കുരുവിള പറഞ്ഞു. സർക്കാർ തലത്തിലുള്ള പ്രവർത്തനങ്ങൾക്കു പുറമേ നഗരസഭാ തലത്തിൽ വിവിധ വകുപ്പുകളുടെ യോഗം ചേർന്ന് പ്രവർത്തനങ്ങൾ ആസൂത്രണം ചെയ്ത് നടപ്പാക്കി. മാലിന്യ സംസ്കരണത്തിന് താത്കാലിക തൊഴിലാളികളെ നിയമിച്ചു. മാലിന്യം തരംതിരിച്ച് ശേഖരിക്കാൻ ബിന്നുകളും ബോട്ടിൽ ബൂത്തുകളും ക്രമീകരിച്ചു. വിവിധ ഭാഷകളിൽ ബോധവത്കരണത്തിനും നിർദേശങ്ങൾക്കുമായി എൽഇഡി ഡിസ്പ്ലേ ബോർഡുകളും ദിശാ ബോർഡുകളും സ്ഥാപിച്ചു. കുടിവെള്ള സ്രോതസുകളിൽ പരിശോധന നടത്തി. ശുചിത്വം ഉറപ്പാക്കുന്നതിന് ആരോഗ്യവിഭാഗം പരിശോധന നടത്തി. 24 മണിക്കൂറും മെഡിക്കൽ സേവനവും ഉറപ്പാക്കിയിട്ടുണ്ടെന്ന് ചെയർമാൻ അറിയിച്ചു













