റോം : റോമിലെ കൊളോസിയത്തില് ദുഃഖവെള്ളിയാഴ്ച നടന്ന കുരിശിന്റെ വഴി ശുശ്രൂഷകളില് മുഴുവന് സമയവും തടിമരക്കുരിശ് വഹിച്ച് ലിയോ പതിനാലാമന് മാര്പാപ്പ ചരിത്രം കുറിച്ചു. വിശുദ്ധ ജോണ് പോള് രണ്ടാമന് മാര്പാപ്പയ്ക്ക് ശേഷം (1980 മുതല് 1994 വരെ) ഇത്തരത്തില് ശുശ്രൂഷയിലുടനീളം കുരിശ് വഹിക്കുന്ന രണ്ടാമത്തെ മാര്പാപ്പയാണ് അദ്ദേഹം. പ്രായാധിക്യവും ആരോഗ്യപ്രശ്നങ്ങളും കാരണം സമീപകാലത്ത് മാര്പാപ്പമാര് കുരിശിന്റെ വഴിയില് പൂര്ണ്ണമായി കുരിശ് വഹിക്കാറില്ലായിരുന്നു. എന്നാല് ഇത്തവണ 70 വയസ്സുകാരനായ ലിയോ പതിനാലാമന് മാര്പാപ്പ എല്ലാ 14 സ്ഥലങ്ങളിലും കുരിശ് വഹിച്ചുകൊണ്ട് വിശ്വാസികള്ക്ക് മാതൃകയായി.
മുപ്പതിനായിരത്തോളം വിശ്വാസികള് കൊളോസിയത്തിന് പുറത്ത് നേരിട്ടും, ലക്ഷക്കണക്കിന് ആളുകള് സോഷ്യല് മീഡിയ, ടെലിവിഷന്, റേഡിയോ എന്നിവയിലൂടെയും ഈ പ്രാര്ത്ഥനയില് പങ്കുചേര്ന്നു. ‘ക്രിസ്തു ഇന്നും പീഡനമനുഭവിക്കുന്നു’ എന്നതിന്റെ പ്രതീകമായാണ് താന് കുരിശ് വഹിക്കുന്നതെന്ന് മാര്പാപ്പ പറഞ്ഞു. ലോകത്തിലെ യുദ്ധങ്ങള്ക്കും ദുരിതങ്ങള്ക്കും അറുതിവരുത്താന് അധികാരമുള്ളവര് വിവേകത്തോടെ പ്രവര്ത്തിക്കണമെന്ന് അദ്ദേഹം ആഹ്വാനം ചെയ്തു.
ആദ്യകാല ക്രിസ്ത്യാനികള് രക്തസാക്ഷിത്വം വരിച്ച പുരാതന റോമന് നിര്മ്മിതിയായ കൊളോസിയത്തില് മെഴുകുതിരി വെളിച്ചത്തിലാണ് ശുശ്രൂഷകള് നടന്നത്.അമേരിക്കന് വംശജനായ ലിയോ പതിനാലാമന് മാര്പാപ്പയുടെ ഈ പ്രവൃത്തി ആഗോള കത്തോലിക്കാ സഭയില് വലിയ ആത്മീയ ഉണര്വ്വ് നല്കുന്ന ഒന്നായി വിലയിരുത്തപ്പെടുന്നു.
