തിരുവനന്തപുരം : താൻ പാർട്ടി വിടുന്നു എന്ന തരത്തിൽ മാധ്യമങ്ങളിൽ പ്രചരിക്കുന്ന വാർത്തകൾക്ക് മറുപടിയുമായി ശശി തരൂർ എംപി. താൻ ബിജെപിയിലേക്കോ സിപിഎമ്മിലേക്കോ പോകില്ലെന്നും കോൺഗ്രസുകാരനായി തന്നെ തുടരുമെന്നും അദ്ദേഹം വ്യക്തമാക്കി. വരാനിരിക്കുന്ന തിരഞ്ഞെടുപ്പിനെ സജീവമായി കാണുമെന്നും യുഡിഎഫിന്റെ (UDF) വിജയത്തിനായി സജീവമായി രംഗത്തുണ്ടാകുമെന്നും അദ്ദേഹം ഉറപ്പിച്ചു പറഞ്ഞു. ചില വിഷയങ്ങളിൽ താൻ എടുത്ത നിലപാടുകൾ ബിജെപി അനുകൂലമായി (Pro-BJP) വ്യാഖ്യാനിക്കപ്പെട്ടതിനെക്കുറിച്ച് അദ്ദേഹം വിശദീകരിച്ചു. താൻ എടുത്ത നിലപാടുകൾ ഗവൺമെന്റിനോടോ ഇന്ത്യയോടോ ഉള്ള അനുഭാവം (Pro-Government/Pro-India) മാത്രമാണെന്നും അന്താരാഷ്ട്ര കാര്യങ്ങളിൽ രാഷ്ട്രീയം പറയുന്നതിനേക്കാൾ രാഷ്ട്രത്തിനുവേണ്ടി സംസാരിക്കാനാണ് താൻ ആഗ്രഹിക്കുന്നതെന്നും അദ്ദേഹം പറഞ്ഞു.
ശ്രീനാരായണ ഗുരുവിന്റെ “മതം ഏതായാലും മനുഷ്യൻ നന്നായാൽ മതി” എന്ന വചനത്തെ ഉദ്ധരിച്ചുകൊണ്ട്, “രാഷ്ട്രീയം ഏതായാലും രാഷ്ട്രം നന്നായാൽ മതി” എന്നതാണ് തന്റെ പൂർണ്ണമായ വിശ്വാസമെന്നും 2009 മുതൽ താൻ ഇതാണ് പറയുന്നതെന്നും അദ്ദേഹം കൂട്ടിച്ചേർത്തു. പാർട്ടിയുടെ നയങ്ങളെ എതിർക്കാൻ പാർലമെന്റിനകത്ത് ഒരു അംഗത്തിന് അവകാശമില്ലെന്ന് താൻ സമ്മതിക്കുന്നുവെന്നും ഇതുവരെ പാർട്ടി എടുത്ത നിലപാടുകൾക്കൊപ്പം തന്നെയാണ് നിന്നിട്ടുള്ളതെന്നും തരൂർ വ്യക്തമാക്കി. താൻ പാർട്ടി വിടുന്നു എന്ന വാർത്തകൾ മാധ്യമങ്ങൾ സൃഷ്ടിക്കുന്നതാണെന്നും എന്തിനാണ് തന്നോട് മാത്രം ഇത്തരം ചോദ്യങ്ങൾ ചോദിക്കുന്നതെന്ന് മനസ്സിലാകുന്നില്ലെന്നും അദ്ദേഹം പറഞ്ഞു.
