റിയാദ്: മക്കയിൽ സർവീസ് നടത്തിക്കൊണ്ടിരുന്ന യാത്രാ ബസിന് തീപിടിച്ചു. ഉടൻ തന്നെ സൗദി സിവിൽ ഡിഫൻസ് സേന സ്ഥലത്തെത്തി തീയണച്ചതിനാൽ വൻ ദുരന്തം ഒഴിവായി. ഞായറാഴ്ചയായിരുന്നു സംഭവം. അപകടത്തെക്കുറിച്ചുള്ള വിവരം ലഭിച്ച ഉടൻ തന്നെ മക്കയിലെ സിവിൽ ഡിഫൻസ് യൂണിറ്റുകൾ അതിവേഗം സംഭവസ്ഥലത്ത് എത്തിച്ചേരുകയായിരുന്നു. സംഭവത്തിൽ ആർക്കും പരിക്കുകളോ ജീവനാശമോ സംഭവിച്ചിട്ടില്ലെന്ന് ജനറൽ ഡയറക്ടറേറ്റ് ഓഫ് സിവിൽ ഡിഫൻസ് ഔദ്യോഗികമായി സ്ഥിരീകരിച്ചു. തീപിടിത്തത്തിന്റെ കാരണം കണ്ടെത്താൻ അധികൃതർ അന്വേഷണം ആരംഭിച്ചിട്ടുണ്ട്.
