കൊളംബസ്: സെന്റ് മേരീസ് സീറോമലബാർ കാത്തോലിക് മിഷനിലെ വാർഷിക തിരുനാൾ ആഘോഷങ്ങൾ ഭക്തിസാന്ദ്രമായ അന്തരീക്ഷത്തിൽ സമാപിച്ചു. ഞായറാഴ്ച ഉച്ചകഴിഞ്ഞ് രണ്ടിന് അർപ്പിച്ച ആഘോഷമായ തിരുനാൾ കുർബാനയിൽ കൊളംബസ് രൂപതാ മെത്രാൻ ബിഷപ് മാർ ഈർൾ കെ. ഫെർണാണ്ടസ് മുഖ്യ കാർമികത്വം വഹിച്ചു. മിഷൻ ഡയറക്ടർ റവ.ഫാ. നിബി കണ്ണായി, റവ.ഫാ. അബി തമ്പി, റവ.ഫാ. അനീഷ് തോമസ്, റവ.ഫാ. ആന്റണി ചോരവടി, റവ.ഫാ. ജിൻസ് കുപ്പക്കാര, റവ.ഫാ. ജോസഫ് തോമസ്, റവ.ഫാ. പെത്രോസ് ബൊട്ടാച്ചേവ്, റവ.ഫാ. ടോം ആന്റോ പുത്തൻകാലം, റവ.ഫാ. വിൻസെന്റ് ടി. എൻഗുയാൻ എന്നിവർ തിരുക്കർമങ്ങളിൽ സഹകാർമികരായി. വിശുദ്ധ കുർബാനയ്ക്ക് ശേഷം ഭക്തിനിർഭരമായ പ്രസുദേന്തി വാഴ്ചയും തിരുനാൾ പ്രഘോഷണ പ്രദക്ഷിണവും നടന്നു. തുടർന്ന് വൈകുന്നേരം അഞ്ചിന് സ്നേഹവിരുന്നിന്റെ മുന്നോടിയായി ചായ സത്കാരവും ഒരുക്കിയിരുന്നു. വൈകുന്നേരം ആറിന് ആരംഭിച്ച പൊതുസമ്മേളനത്തിലും ഇടവകാംഗങ്ങളുടെ വിവിധ കലാപരിപാടികളിലും വലിയൊരു വിശ്വാസി സമൂഹം പങ്കെടുത്തു. രാത്രി 8.30ന് നടന്ന കരിമരുന്ന് പ്രയോഗവും തുടർന്ന് 8.45ന് ഒരുക്കിയ സ്നേഹവിരുന്നോടും കൂടി തിരുനാൾ ആഘോഷങ്ങൾക്ക് സമാപനമായി. സ്വർഗീയ അമ്മയുടെ മാധ്യസ്ഥത യാചിച്ചുകൊണ്ട് ഒരൊറ്റ കുടുംബമായി വിശ്വാസികൾ ഒത്തുചേർന്ന അനുഗ്രഹീത നിമിഷങ്ങൾക്കാണ് മിഷൻ സാക്ഷ്യം വഹിച്ചത്.











