വാഷിംഗ്ൺ ഡിസി: അമേരിക്കയിൽ വിവിധ മുൻനിര ബാങ്കുകളുടെ ഓൺലൈൻ സേവനങ്ങൾ തടസപ്പെട്ടത് ഉപഭോക്താക്കളെയും അധികൃതരെയും ഒരുപോലെ ആശങ്കയിലാഴ്ത്തി. ബാങ്ക് ഓഫ് അമേരിക്ക, യുഎസ് ബാങ്ക്, ജെ.പി. മോർഗൻ ചേസ് തുടങ്ങിയ പ്രമുഖ ബാങ്കുകളുടെ പ്രവർത്തനമാണ് താറുമാറായത്. ഡിജിറ്റൽ അക്കൗണ്ടുകൾ ആക്സസ് ചെയ്യാനോ പണമിടപാടുകൾ നടത്താനോ കഴിയാതെ ഉപഭോക്താക്കൾ വലഞ്ഞു. മൈക്രോസോഫ്റ്റ് സേവനങ്ങളും എയർ ട്രാഫിക് കൺട്രോൾ സംവിധാനവും സ്തംഭിച്ചതിന് പിന്നാലെയാണ് ബാങ്കിംഗ് മേഖലയിലും സാങ്കേതിക തകരാർ റിപ്പോർട്ട് ചെയ്തിരിക്കുന്നത് എന്നത് സ്ഥിതിഗതികളുടെ ഗൗരവം വർധിപ്പിക്കുന്നു.തിങ്കളാഴ്ചയോടെയാണ് ബാങ്കിംഗ് സേവനങ്ങൾ മുടങ്ങിയതായി വ്യാപക പരാതികൾ ഉയർന്നുതുടങ്ങിയത്. ജെ.പി മോർഗൻ ചേസ് ബാങ്കിനെയാണ് പ്രതിസന്ധി ഏറ്റവും രൂക്ഷമായി ബാധിച്ചത്. അയ്യായിരത്തോളം ഉപഭോക്താക്കളാണ് സേവനങ്ങൾ തടസപ്പെട്ടതായി പരാതി നൽകിയത്. അക്കൗണ്ട് ബാലൻസ് പരിശോധിക്കാനോ, പണം അയക്കാനോ, ഔദ്യോഗിക വെബ്സൈറ്റ് വഴി ലോഗിൻ ചെയ്യാനോ സാധിക്കുന്നില്ലെന്ന് ഉപഭോക്താക്കൾ പരാതിപ്പെട്ടു.
ഓൺലൈൻ സേവനങ്ങൾ തടസപ്പെട്ടതിന് പിന്നിൽ സൈബർ ആക്രമണമല്ലെന്നും, തികച്ചും സാങ്കേതികമായ തകരാറാണെന്നും യുഎസ് അധികൃതർ വ്യക്തമാക്കി. അക്കൗണ്ടുകളിലെ ഉപഭോക്താക്കളുടെ പണം സുരക്ഷിതമാണെന്നും ഇടപാടുകൾ പൂർത്തിയാക്കുന്നതിൽ ചില സാങ്കേതിക തടസങ്ങൾ മാത്രമാണ് നേരിടുന്നതെന്നും ചേസ് ബാങ്ക് അധികൃതർ അറിയിച്ചു. തകരാറുകൾ പരിഹരിക്കാനുള്ള നടപടികൾ പുരോഗമിക്കുകയാണെന്നും എത്രയും പെട്ടെന്ന് സേവനങ്ങൾ സാധാരണ നിലയിലാകുമെന്നും ബാങ്ക് അധികൃതർ കൂട്ടിച്ചേർത്തു. ദിവസങ്ങൾക്ക് മുമ്പ് മൈക്രോസോഫ്റ്റ് സേവനങ്ങളിലും എയർ ട്രാഫിക് കൺട്രോൾ സംവിധാനത്തിലും തകരാറുകൾ റിപ്പോർട്ട് ചെയ്തിരുന്നു. ഇതിന്റെ തുടർച്ചയെന്നോണം യുഎസിലെ യുണൈറ്റഡ് എയർലൈൻസിലും സാങ്കേതിക പ്രശ്നങ്ങൾ ഉണ്ടായി. വിമാനങ്ങൾ വൈകിയെങ്കിലും മൂന്ന് മണിക്കൂറിനുള്ളിൽ പ്രശ്നം പരിഹരിച്ചതായി എയർലൈൻ അധികൃതർ വ്യക്തമാക്കി. സൈബർ സുരക്ഷാ പ്രശ്നങ്ങളല്ല ഇതിന് കാരണമെന്നും അവർ കൂട്ടിച്ചേർത്തു.











