Home ഓഷിയാന മെൽബണിൽ വടംവലിക്കളം ഒരുങ്ങി; റെക്കോർഡ് സമ്മാനത്തുകയ്ക്കായി നോർത്ത് അമേരിക്കയിൽ നിന്ന് രണ്ട് പ്രമുഖ ടീമുകൾ

മെൽബണിൽ വടംവലിക്കളം ഒരുങ്ങി; റെക്കോർഡ് സമ്മാനത്തുകയ്ക്കായി നോർത്ത് അമേരിക്കയിൽ നിന്ന് രണ്ട് പ്രമുഖ ടീമുകൾ

50
0
മെൽബൺ പോർക്കളം 2026 അന്താരാഷ്ട്ര വടംവലി മത്സരത്തിന്റെ വാർത്താചിത്രം

റിപ്പോർട്ട്: അനിൽ മറ്റത്തിക്കുന്നേൽ

ഷിക്കാഗോ: ഓസ്‌ട്രേലിയൻ മലയാളികളുടെ കായികചരിത്രത്തിൽ പുതിയ അധ്യായം കുറിച്ചുകൊണ്ട് മെൽബണിൽ നവംബർ 14 ശനിയാഴ്ച നടക്കുന്ന ‘പോർക്കളം 2026’ അന്താരാഷ്ട്ര വടംവലി മത്സരത്തിന് കളമൊരുങ്ങി. ഓസ്‌ട്രേലിയയിൽ ഇതുവരെ സംഘടിപ്പിച്ചിട്ടുള്ള വടംവലി ടൂർണമെന്റുകളിൽ ഏറ്റവും ഉയർന്ന സമ്മാനത്തുക നൽകുന്ന മത്സരമാണിതെന്ന് സംഘാടകർ പറയുന്നു. നോർത്ത് അമേരിക്കയിൽ നിന്നുള്ള രണ്ട് പ്രമുഖ ടീമുകൾ പങ്കെടുക്കുന്നതും ശ്രദ്ധേയമാണ്.

മെൽബൺ മലയാളി ഫെഡറേഷന്റെ (MMF) ആഭിമുഖ്യത്തിൽ സംഘടിപ്പിക്കുന്ന മത്സരത്തിൽ കാനഡയിൽ നിന്നുള്ള ഗ്ലാഡിയേറ്റേഴ്‌സ് കാനഡയും കോട്ടയം ബ്രദേഴ്‌സ് കാനഡയും (KBC) മാറ്റുരയ്ക്കും. ഓസ്‌ട്രേലിയയിലെ വിവിധ സംസ്ഥാനങ്ങളിൽ നിന്നും ന്യൂസിലൻഡ് ഉൾപ്പെടെയുള്ള വിദേശ രാജ്യങ്ങളിൽ നിന്നുമുള്ള ടീമുകളും പങ്കെടുക്കുന്നതോടെ മെൽബൺ രാജ്യാന്തര വടംവലിയുടെ ആവേശകരമായ വേദിയായി മാറും.

ഷിക്കാഗോ സോഷ്യൽ ക്ലബ്ബിന്റെ പന്ത്രണ്ടാമത് അന്താരാഷ്ട്ര വടംവലി ടൂർണമെന്റിൽ ചാമ്പ്യൻ പട്ടം നേടിയ ഗ്ലാഡിയേറ്റേഴ്‌സ് കാനഡയും റണ്ണറപ്പായ കോട്ടയം ബ്രദേഴ്‌സ് കാനഡയും വീണ്ടും ഒരു രാജ്യാന്തര മത്സരവേദിയിൽ എത്തുന്നു. ഷിക്കാഗോയിലെ മത്സരത്തിൽ മികച്ച പ്രകടനം കാഴ്ചവെച്ച ഇരു ടീമുകളും മെൽബണിലും ശക്തമായ പോരാട്ടം കാഴ്ചവെക്കുമെന്ന പ്രതീക്ഷയിലാണ് ആരാധകർ.

ഒന്നാം സ്ഥാനക്കാർക്ക് 10,001 ഓസ്‌ട്രേലിയൻ ഡോളറാണ് സമ്മാനം. രണ്ടാം സ്ഥാനത്തിന് 5,001 ഡോളറും മൂന്നാം സ്ഥാനത്തിന് 3,001 ഡോളറും നാലാം സ്ഥാനത്തിന് 2,001 ഡോളറും ലഭിക്കും. ആദ്യ നാല് സ്ഥാനങ്ങൾക്കായി ആകെ 20,004 ഓസ്‌ട്രേലിയൻ ഡോളറാണ് സമ്മാനത്തുകയായി പ്രഖ്യാപിച്ചിരിക്കുന്നത്.

മെൽബണിലെ സ്കോർസ്ബിയിലുള്ള ഇവന്റ് സെൻട്രൽ അറ്റ് കരീബിയൻ പാർക്കിലാണ് മത്സരം നടക്കുന്നത്. നവംബർ 14 ശനിയാഴ്ച മെൽബൺ സമയം രാവിലെ 9 മണി മുതൽ വൈകിട്ട് 7 മണി വരെയാണ് പരിപാടികൾ. ഇത് ഷിക്കാഗോയിലെ സെൻട്രൽ സ്റ്റാൻഡേർഡ് സമയം (CST) അനുസരിച്ച് നവംബർ 13 വെള്ളിയാഴ്ച വൈകിട്ട് 4 മണി മുതൽ നവംബർ 14 ശനിയാഴ്ച പുലർച്ചെ 2 മണി വരെയാണ്.

വടംവലി മത്സരങ്ങൾക്കൊപ്പം കുടുംബങ്ങൾക്കായി ഭക്ഷണ സ്റ്റാളുകൾ, സ്നാക്ക് കോർണറുകൾ, മെഹന്തി, ഇന്ത്യൻ വസ്ത്രങ്ങളുടെയും ആഭരണങ്ങളുടെയും സ്റ്റാളുകൾ, കുട്ടികൾക്കായി ഫേസ് പെയിന്റിങ്, ജമ്പിങ് കാസിലുകൾ തുടങ്ങിയവയും ഒരുക്കിയിട്ടുണ്ട്. പ്രവേശനം സൗജന്യമാണ്.

ഓസ്‌ട്രേലിയയിലെ മലയാളി സമൂഹം സംഘടിപ്പിക്കുന്ന ഈ രാജ്യാന്തര കായികമാമാങ്കത്തിന് ഷിക്കാഗോ സോഷ്യൽ ക്ലബ്ബിന്റെ നിയുക്ത എക്‌സിക്യൂട്ടീവ് കമ്മിറ്റിയും ക്ലബ്ബിന്റെ അന്താരാഷ്ട്ര വടംവലി ടൂർണമെന്റ് കമ്മിറ്റിയും ആശംസകൾ അറിയിച്ചു. മത്സരത്തിൽ പങ്കെടുക്കുന്ന എല്ലാ ടീമുകൾക്കും വിജയാശംസകൾ നേർന്നതോടൊപ്പം നോർത്ത് അമേരിക്കയിൽ നിന്നുള്ള ടീമുകളുടെ സാന്നിധ്യം ഈ ടൂർണമെന്റിന്റെ മാറ്റുകൂട്ടുമെന്നും അവർ പ്രത്യാശ പ്രകടിപ്പിച്ചു.

റെക്കോർഡ് സമ്മാനത്തുകയും നോർത്ത് അമേരിക്കൻ ടീമുകളുടെ സാന്നിധ്യവും കൊണ്ട് ശ്രദ്ധേയമാകുന്ന ‘പോർക്കളം 2026’, ഓസ്‌ട്രേലിയൻ മലയാളികളുടെ കായികചരിത്രത്തിൽ പുതിയൊരു നാഴികക്കല്ലാകുമെന്ന പ്രതീക്ഷയിലാണ് സംഘാടകരും കായികപ്രേമികളും.

Previous articleഅമേരിക്കയിലെ ഡാറ്റാ സെന്റർ സാമ്രാജ്യങ്ങൾ; ഡിജിറ്റൽ ലോകത്തിന്റെ നിയന്ത്രണകേന്ദ്രങ്ങളായി മാറുന്ന നഗരങ്ങൾ | ഭാഗം 5
Next articleഅമേരിക്കയിൽ രാജ്യവ്യാപക ഗ്രൗണ്ട് സ്റ്റോപ്പ്; വിമാനങ്ങളുടെ പുറപ്പെടൽ നിർത്തിവെച്ച് FAA

LEAVE A REPLY