ചെന്നൈ: ദീപാവലി ആഘോഷങ്ങളുടെ ഭാഗമായി പടക്കം പൊട്ടിക്കുന്നതിന് കർശന സമയപരിധിയും നിയന്ത്രണങ്ങളും ഏർപ്പെടുത്തി തമിഴ്‌നാട് സർക്കാർ. അമിതമായ വായു-ശബ്‌ദ മലിനീകരണം തടയുന്നതിനും സുരക്ഷിതവുമായ ആഘോഷങ്ങൾ ഉറപ്പാക്കുന്നതിനുമാണ് പുതിയ ഉത്തരവ്. സർക്കാർ പുറത്തിറക്കിയ ഔദ്യോഗിക വാർത്താക്കുറിപ്പ് പ്രകാരം ദിവസേന രാവിലെ ആറു മുതൽ ഏഴു വരെയും വൈകീട്ട് ഏഴു മുതൽ ഏട്ടു വരെയും മാത്രമാണ് പടക്കം പൊട്ടിക്കാൻ അനുവാദമുള്ളൂ. ആശുപത്രികൾ, വിദ്യാഭ്യാസ സ്ഥാപനങ്ങൾ, കോടതികൾ, ആരാധനാലയങ്ങൾ എന്നിവയ്ക്ക് സമീപവും തീപിടിക്കാൻ സാധ്യതയുള്ള വൈക്കോൽ മേഞ്ഞ വീടുകൾക്കടുത്തും പടക്കം പൊട്ടിക്കുന്നത് കർശനമായി നിരോധിച്ചിരിക്കുന്നു. അമിത ശബ്ദമുണ്ടാക്കുന്ന പടക്കങ്ങൾ പൂർണമായും ഒഴിവാക്കണം. 2018 ലെ സുപ്രീം കോടതി ഉത്തരവ് പ്രകാരം മലിനീകരണം കുറഞ്ഞ ഹരിത പടക്കങ്ങൾ മാത്രമേ നിർമിക്കാനും വിൽക്കാനും പാടുള്ളൂ. ‘പ്രകാശത്തിന്‍റെയും കുടുംബ സന്തോഷത്തിന്‍റെയും ആഘോഷമാണ് ദീപാവലി. പ്രകൃതിയോട് ഇണങ്ങിനിൽക്കുന്ന രീതിയിൽ വേണം ഇത് ആഘോഷിക്കാൻ. അമിതമായ ശബ്ദവും പുകയും ഉണ്ടാക്കുന്ന പടക്കങ്ങൾക്ക് പകരം പരിസ്ഥിതി സൗഹൃദമായ രീതികൾ തെരഞ്ഞെടുക്കണം’ എന്ന് സർക്കാർ അറിയിച്ചു. നിയന്ത്രണങ്ങൾ കർശനമായി നടപ്പിലാക്കുന്നതിന്‍റെ ഭാഗമായി തമിഴ്‌നാട് മലിനീകരണ നിയന്ത്രണ ബോർഡിന്‍റെ നേതൃത്വത്തിൽ സ്‌കൂളുകൾ, കോളജുകൾ, ജില്ലാ ഭരണകൂടങ്ങൾ എന്നിവയുടെ സഹകരണത്തോടെ വ്യാപകമായ ബോധവൽക്കരണ പരിപാടികൾക്കും തുടക്കം കുറിച്ചിട്ടുണ്ട്. പരിസ്ഥിതി സംരക്ഷിക്കേണ്ടത് എല്ലാവരുടെയും കൂട്ടായ ഉത്തരവാദിത്തമാണെന്ന് അധികൃതർ ഓർമ്മിപ്പിച്ചു.
