വൈക്കം: വേമ്പനാട്ടുകായലിലെ പ്ലാസ്റ്റിക് മാലിന്യം നീക്കാൻ ജനകീയ പങ്കാളിത്തത്തോടെ വൈക്കം സഹൃദയവേദി. ആദ്യഘട്ടത്തിൽ തണ്ണീർമുക്കം ബണ്ടിന്റെ വെച്ചൂർ പഞ്ചായത്ത് പരിധി മുതൽ വടക്കോട്ട് ചെമ്പ് വരെയാണ് മാലിന്യം ശേഖരിക്കുന്നത്. കായലിന്റെ സജീവത വീണ്ടെടുക്കേണ്ടത് അനിവാര്യമാണെന്നും ജനകീയ ഇടപെടലിലൂടെ മാത്രമേ ഇത് സാധ്യമാകുവെന്നും ഭാരവാഹികൾ പറഞ്ഞു. രാവിലെ 9.30ന് 20 സന്നദ്ധപ്രവർത്തകർ വൈക്കം ബോട്ടുജെട്ടി പരിസരത്ത് നിന്ന് വലിയ വള്ളത്തിൽ കായലിലൂടെ സഞ്ചരിച്ച് പ്ലാസ്റ്റിക് മാലിന്യങ്ങൾ ശേഖരിക്കും. ഇവ പിന്നീട് നഗരസഭയ്ക്ക് കൈമാറും. അടുത്ത ഘട്ടത്തിൽ ജലോപരിതലത്തിലെ മാലിന്യം ജനങ്ങളുടെ സഹായത്തോടെ നീക്കും.
