ന്യൂഡല്ഹി : പശ്ചിമേഷ്യൻ രാജ്യങ്ങളിലെ സംഘർഷം രൂക്ഷമായതോടെ ആഗോള വിപണിയിൽ ക്രൂഡ് ഓയിൽ വില കുതിച്ചുയരുന്നു. ഇതിന്റെ പ്രത്യാഘാതമെന്നോണം രാജ്യത്ത് പെട്രോൾ, ഡീസൽ വിലയിൽ ലിറ്ററിന് നാല് മുതൽ അഞ്ച് രൂപ വരെ വർധനവുണ്ടായേക്കുമെന്ന് ഉന്നത സർക്കാർ വൃത്തങ്ങൾ സൂചിപ്പിച്ചു. ഒപ്പം ഗാർഹിക ആവശ്യത്തിനുള്ള പാചകവാതക സിലിണ്ടറിന് 40 മുതൽ 50 രൂപ വരെ വർധിപ്പിക്കാനും കേന്ദ്ര സർക്കാർ ആലോചിക്കുന്നുണ്ട്. രാജ്യാന്തര വിപണിയിലെ മാറ്റങ്ങൾക്കനുസരിച്ച് വില പുതുക്കാത്തത് എണ്ണക്കമ്പനികൾക്ക് വലിയ ബാധ്യതയുണ്ടാക്കുന്നു എന്ന റിപ്പോർട്ടുകൾക്ക് പിന്നാലെയാണ് പുതിയ നീക്കം.
ഏകദേശം നാല് വർഷത്തെ ഇടവേളയ്ക്ക് ശേഷമുള്ള ഏറ്റവും വലിയ വിലവർധനയ്ക്കാണ് ഇന്ധന വിപണി സാക്ഷ്യം വഹിക്കാൻ പോകുന്നത്. നിലവിൽ എണ്ണ വിപണന കമ്പനികൾ നേരിടുന്ന കടുത്ത സാമ്പത്തിക സമ്മർദ്ദം കുറയ്ക്കാൻ വില വർധിപ്പിക്കുകയല്ലാതെ മറ്റ് മാർഗമില്ലെന്നാണ് ഔദ്യോഗിക വിശദീകരണം. അസംസ്കൃത എണ്ണയുടെ വില ബാരലിന് ക്രമാതീതമായി ഉയർന്നത് കമ്പനികളുടെ ലാഭവിഹിതത്തെ സാരമായി ബാധിച്ചിട്ടുണ്ട്. സർക്കാർ ഈ നിർദ്ദേശത്തിന് അംഗീകാരം നൽകുന്നതോടെ സാധാരണക്കാരുടെ കുടുംബ ബജറ്റിനെ ബാധിക്കുന്ന വലിയൊരു വിലക്കയറ്റത്തിനാകും രാജ്യം സാക്ഷ്യം വഹിക്കുക.
അതേസമയം, വിവിധ സംസ്ഥാനങ്ങളിലെ തെരഞ്ഞെടുപ്പ് നടപടികൾ പൂർത്തിയായ സാഹചര്യത്തിൽ വില വർധന നടപ്പിലാക്കാൻ കമ്പനികൾ സർക്കാരിന് മേൽ സമ്മർദ്ദം ചെലുത്തുന്നുണ്ട്. എന്നാൽ പെട്ടെന്നൊരു പ്രഖ്യാപനത്തിലേക്ക് കടക്കാതെ സ്ഥിതിഗതികൾ സൂക്ഷ്മമായി നിരീക്ഷിച്ച ശേഷം മാത്രം തീരുമാനമെടുത്താൽ മതിയെന്നാണ് കേന്ദ്ര സർക്കാരിന്റെ നിലവിലെ നിലപാട്. പണപ്പെരുപ്പവും വിപണിയിലെ വിലക്കയറ്റവും കണക്കിലെടുത്ത് ഘട്ടംഘട്ടമായി വില വർധിപ്പിക്കാനുള്ള സാധ്യതയും അധികൃതർ തേടുന്നുണ്ട്.
