ജറുസലെം : ഇസ്രായേലില് ഷെല്ലാക്രമണത്തില് മലയാളി യുവാവ് കൊല്ലപ്പെട്ടു. കൊല്ലം സ്വദേശി നിബിന് മാക്സ്വെല്ലാണ് കൊല്ലപ്പെട്ടത്. സംഭവത്തില് രണ്ട് മലയാളികളടക്കം ഏഴുപേര്ക്ക് പരിക്കേറ്റിട്ടുണ്ടെന്ന് വാര്ത്താ ഏജന്സിയായ പിടിഐ റിപ്പോര്ട്ട് ചെയ്തു. ബുഷ് ജോസഫ് ജോര്ജ്, പോള് മെല്വിന് എന്നിവര്ക്കാണ് പരിക്കേറ്റത്. ഇടുക്കി സ്വദേശിയാണ് പോള് മെല്വിന്. ഇവർ കാർഷിക മേഖലയിലെ ജീവനക്കാരായിരുന്നു. ഗലീലി ഫിംഗറില് മൊഷാവെന്ന സ്ഥലത്ത് പ്രാദേശിക സമയം തിങ്കളാഴ്ച രാവിലെ 11 മണിയോടെയായിരുന്നു ആക്രമണം നടന്നത്. കൊല്ലം വാടി സ്വദേശി നിബിൻ മാക്സ്വെല്ലിൻ്റെ മരണം ഇസ്രായേലിൽ എത്തി രണ്ടു മാസം പിന്നിട്ടപ്പോൾ. ഇക്കഴിഞ്ഞ ഡിസംബറിലാണ് നിബിനും സഹോദരൻ നിവിനും ഇസ്രായേലിൽ ജോലിക്കായി എത്തിയത്. ഇരുവരും വടക്കൻ ഇസ്രായേലിലെ ഗലീലി ഫിംഗറിൽ മൊഷാവ് എന്ന സ്ഥലത്ത് കാർഷിക മേഖലയിൽ ജോലി ചെയ്തുവരികയായിരുന്നു. തിങ്കളാഴ്ച ഇസ്രായേൽ സമയം രാവിലെ 11 മണിയോടെയുണ്ടായ മിസൈൽ ആക്രമണത്തിലാണ് നിബിന് ജീവൻ നഷ്ടമായത്. ഹിസ്ബുള്ള ആണ് ആക്രമണത്തിന് പിന്നിലെന്നാണ് വിവരം.
മൊഷാവിലെ പോൾട്രി ഫാമിൽ ജോലി ചെയ്തുവരികയായിരുന്നു നിബിൻ. നേരത്തെ ഗൾഫ് ജീവിതം അവസാനിപ്പിച്ചു നാട്ടിലെത്തിയ നിബിൻ കുറച്ചു കാലം നാട്ടിൽ കഴിഞ്ഞ ശേഷം ഇക്കഴിഞ്ഞ ഡിസംബറിൽ ഇസ്രായേലിലേക്ക് പോകുകയായിരുന്നു. ആഴ്ചയുടെ വ്യത്യാസത്തിൽ സഹോദരൻ നിവിനും ഇസ്രായേലിലേക്ക് പോയിരുന്നു. കൊല്ലപ്പെട്ട നിബിൻ ഇസ്രായേൽ അതിർത്തിയിലാണ് താമസിച്ചിരുന്നതെന്നാണ് കുടുംബം പങ്കുവെക്കുന്നത്. തിങ്കളാഴ്ച വൈകിട്ട് നാലരയോടെയാണ് കുടുംബം നിബിന്റെ മരണവിവരം അറിയുന്നത്. മൂത്തമകൻ നിവിൻ ആണ് വിവരമറിയിച്ചതെന്ന് പിതാവ് മാക്സ്വെൽ ഏഷ്യാനെറ്റ് ന്യൂസിനോട് പ്രതികരിച്ചു. അപ്പച്ചൻ വീടിന് പുറത്തേക്ക് ഇറങ്ങാൻ മകൻ പറഞ്ഞു. സ്ഫോടനം ഉണ്ടായെന്നും നിബിൻ ആശുപത്രിയിലാണെന്നും പറഞ്ഞു. ആശുപത്രിയിൽ ആര് ഉണ്ടെന്ന് ചോദിച്ചപ്പോൾ, നിബിൻ്റെ ഭാര്യയുടെ അനിയത്തിയുടെ ഭർത്താവ് ആശുപത്രിയിലേക്ക് പോയിക്കൊണ്ടിരിക്കുയാണെന്നും എന്തെങ്കിലും ഉണ്ടെങ്കിൽ വിളിക്കാമെന്നും പറഞ്ഞു.
നിബിന് ചെറിയൊരു മുറിവേറ്റുവെന്നാണ് അറിഞ്ഞത്. തായ്വാൻകാരായ രണ്ടുപേർ മരിച്ചുവെന്നും മലയാളിയായ മറ്റൊരാളുടെ മുഖത്തിനു സാരമായ പരിക്കേറ്റുവെന്നും പറഞ്ഞു. ഉച്ചയ്ക്ക് 12.45 ഓടെ മോൻ വിളിച്ചപ്പോൾ അപ്പച്ചാ അവൻ മരിച്ചുപോയി എന്ന് പറഞ്ഞു. അപ്പോഴാണ് മരണവിവരം അറിയുന്നതെന്നും മാക്സ്വെൽ പറഞ്ഞു. നിബിൻ്റെ ഭാര്യ ഗർഭിണിയാണ്. അഞ്ചു വയസ്സുകാരിയായ മകളുണ്ട്. കാർഷിക മേഖലയായ മൊഷാവിൽ നിരവധി ഫാമുകളുണ്ട്. ഇവിടെ നിരവധി മലയാളികൾ ജോലിചെയ്യുന്നുണ്ട്. മിസൈൽ ആക്രമണത്തിൽ മൊത്തം എട്ടുപേർക്ക് പരിക്കേറ്റുവെന്നാണ് റിപ്പോർട്ട്. പരിക്കേറ്റവരിൽ ഇടുക്കി സ്വദേശി ഉൾപ്പെടെ രണ്ടു മലയാളികളും ഉൾപ്പെടുന്നുണ്ട്. ആക്രമണം ഞെട്ടിക്കുന്നതാണെന്ന് ഇന്ത്യയിലെ ഇസ്രായേൽ എംബസി പ്രതികരിച്ചു. പരിക്കേറ്റവർക്ക് ചികിത്സ ഉറപ്പാക്കിയിട്ടുണ്ടെന്നും കൊല്ലപ്പെട്ടവരുടെ കുടുംബാംഗങ്ങളുടെ ദുഖത്തിൽ പങ്കുചേരുന്നുവെന്നും എംബസി പറഞ്ഞു. അതേസമയം സീവ് ആശുപത്രിയിലാണ് നിബിൻ്റെ മൃതദേഹം സൂക്ഷിച്ചിരിക്കുന്നത്.
