ദോഹ (ഖത്തര്) : പശ്ചിമേഷ്യയിൽ തുടരുന്ന സംഘർഷങ്ങൾക്കിടയിൽ, ഹോർമുസ് കടലിടുക്കിന് സമീപം തങ്ങളുടെ വ്യോമ പ്രതിരോധ സംവിധാനം ശത്രുവിന്റെ എഫ്-15 യുദ്ധവിമാനം വെടിവെച്ചിട്ടതായി ഇറാൻ അവകാശപ്പെട്ടു. സ്റ്റേറ്റ് മാധ്യമങ്ങളും ഇറാനിയൻ റെവല്യൂഷണറി ഗാർഡുകളും (ഐആർജിസി) ഇത് സ്ഥിരീകരിച്ചിട്ടുണ്ട്. അത്യാധുനിക വ്യോമ പ്രതിരോധ സംവിധാനങ്ങൾ ഉപയോഗിച്ചാണ് യുഎസ് യുദ്ധവിമാനം തടഞ്ഞുനിർത്തി നശിപ്പിച്ചതെന്ന് ഐ ആര് ജി സി പറഞ്ഞു. ഇറാന്റെ തെക്കൻ മേഖലയ്ക്ക് സമീപം ഒരു ദൗത്യത്തിലായിരുന്ന അമേരിക്കയുടെ എഫ്-15 ജെറ്റിനെയാണ് തങ്ങളുടെ വ്യോമ പ്രതിരോധ സേന വിജയകരമായി വെടിവച്ചിട്ടതെന്ന് ഇറാൻ അവകാശപ്പെട്ടു. തങ്ങളുടെ ശക്തമായ പ്രതിരോധ ശേഷിയുടെ തെളിവായിട്ടാണ് ഐആർജിസി ഇതിനെ വിശേഷിപ്പിച്ചത്. എന്നാല്, യുഎസ് സൈന്യം (CENTCOM) ഈ അവകാശവാദം സ്വീകരിക്കുകയോ നിരസിക്കുകയോ ചെയ്തിട്ടില്ല.
ഇറാൻ യുഎസ് യുദ്ധവിമാനങ്ങളൊന്നും വെടിവച്ചിട്ടില്ലെന്നും അമേരിക്കൻ സേന ഇപ്പോഴും പ്രദേശത്ത് വ്യോമ മേധാവിത്വം നിലനിർത്തുന്നുണ്ടെന്നും യു എസ് പ്രസിഡന്റ് ഡോണാള്ഡ് ട്രംപ് പറഞ്ഞു. ഇരുപക്ഷത്തിന്റെയും അവകാശവാദം തർക്കത്തിന് ആക്കം കൂട്ടി. ഇറാന്റെ അവകാശവാദങ്ങൾ പ്രകാരം, ഈ സംഘർഷത്തിൽ യുഎസിന് കനത്ത നഷ്ടം സംഭവിച്ചിട്ടുണ്ട്. ഇതുവരെ 16-ലധികം യുഎസ് വിമാനങ്ങൾ നശിപ്പിക്കപ്പെട്ടതായി റിപ്പോർട്ടുകൾ സൂചിപ്പിക്കുന്നു. അവയിൽ ഭൂരിഭാഗവും MQ-9 റീപ്പർ ഡ്രോണുകളാണ്, പത്തിലധികം റിപ്പോർട്ട് ചെയ്യപ്പെട്ടിട്ടുണ്ട്. ഈ ഡ്രോണുകൾ വിലയേറിയതും ദീർഘദൂര നിരീക്ഷണത്തിനായി ഉപയോഗിക്കുന്നതുമാണ്. F-35 പോലുള്ള ചില യുദ്ധ വിമാനങ്ങളേയും ഇത് ബാധിച്ചിട്ടുണ്ട്.
എഫ്-15 ജെറ്റുകളെ ലക്ഷ്യമിട്ടതായി ഇറാൻ പലതവണ അവകാശപ്പെട്ടിട്ടുണ്ട്. കുവൈറ്റിന്റെ വ്യോമ പ്രതിരോധ സേന മുമ്പ് മൂന്ന് എഫ്-15 വിമാനങ്ങളെ ശത്രുവിമാനങ്ങളാണെന്ന് തെറ്റിദ്ധരിച്ച് വെടിവച്ചു വീഴ്ത്തി, പൈലറ്റുമാർ പരിക്കേൽക്കാതെ രക്ഷപ്പെട്ടു. അത് ‘Friendly fire’ ആണെന്ന് ട്രംപ് വിശേഷിപ്പിച്ചെങ്കിലും കുവൈറ്റ് സൈന്യം മനഃപ്പൂര്വ്വം വെടിവെച്ചിട്ടതാണെന്നും പറയപ്പെടുന്നു. ഇന്ധനം നിറയ്ക്കുന്നതിനിടെ ഒരു കെസി-135 സ്ട്രാറ്റോ ടാങ്കർ തകർന്നുവീണ് ആറ് ക്രൂ അംഗങ്ങൾ കൊല്ലപ്പെട്ടു. ഇറാന്റെ കരുത്തുറ്റ മിസൈലും പ്രതിരോധ സംവിധാനങ്ങളും നിരവധി ഡ്രോണുകൾ നശിപ്പിച്ചിട്ടുണ്ട്.
എണ്ണ വ്യാപാരത്തെ തടസ്സപ്പെടുത്തുന്ന നിർണായകമായ ഹോർമുസ് കടലിടുക്കിലാണ് സംഘർഷം പൊട്ടിപ്പുറപ്പെടുന്നത്. ഇരുവശത്തുനിന്നുമുള്ള അവകാശവാദങ്ങൾ സ്ഥിതി കൂടുതൽ സങ്കീർണ്ണമാക്കിയിട്ടുണ്ട്. ഇതുവരെ സ്വതന്ത്രമായ സ്ഥിരീകരണമൊന്നും ലഭിച്ചിട്ടില്ല.
