ലോകമെങ്ങുമുള്ള ക്രൈസ്തവര് ഇന്ന് ഭക്തിപൂര്വം പെസഹ വ്യാഴം ആചരിക്കും. 12 ശിഷ്യന്മാരുമൊത്തുള്ള യേശുവിന്റെ അന്ത്യ അത്താഴത്തിന്റെ ഓര്മ്മ പുതുക്കിയാണ് ക്രൈസ്തവര് പെസഹ ആചരിക്കുന്നത്. പള്ളികളില് പ്രത്യേക പ്രാര്ത്ഥനകളും കാല് കഴുകല് ശുശ്രൂഷകളും പെസഹായുമായി ബന്ധപ്പെട്ട് നടക്കും.വിവിധ പളളികളില് നിന്ന് തെരെഞ്ഞെടുക്കപ്പെടുന്ന 12 പേരുടെ കാല് കഴുകുന്ന ചടങ്ങാണ് കാല് കഴുകല് ശുശ്രൂഷ. അന്ത്യ അത്താഴ വേളയില് ശിഷ്യന്മാരുടെ പാദങ്ങള് കഴുകി ക്രിസ്തു വിനയത്തിന്റെ മാതൃക ലോകത്തിന് കാട്ടി കൊടുത്തതിനെ അനുസ്മരിച്ചാണ് ദേവാലയങ്ങളില് കാല് കഴുകല് ശുശ്രൂഷ നടത്തുന്നത്. തുടര്ന്ന് അപ്പം മുറിക്കല് ചടങ്ങും നടക്കും. കുരിശു മരണത്തിന്റെ സ്മരണയില് നാളെ ദുഃഖവെള്ളി ആചരിക്കും.
