അമേരിക്കയിലെ വിർജീനിയയിൽ നേപ്പാൾ സ്വദേശിനിയായ നഴ്‌സ് മമത കാഫ്ലെ ഭട്ടിനെ (28) കൊലപ്പെടുത്തിയ കേസിൽ ഭർത്താവ് നരേഷ് ഭട്ട് (39) കുറ്റക്കാരനാണെന്ന് കോടതി ജൂറി കണ്ടെത്തി. ഒന്നാം ഡിഗ്രി കൊലപാതകം (First-degree murder), മൃതദേഹം ഒളിപ്പിക്കൽ, മൃതദേഹത്തോട് അനാദരവ് കാണിക്കൽ എന്നീ മൂന്ന് കുറ്റങ്ങളിലാണ് വിധി. 2024 ജൂലൈയിൽ വിർജീനിയയിലെ Manassas Park-ലുള്ള വീട്ടിൽനിന്നാണ് മമതയെ കാണാതായത്. ആശുപത്രിയിലെ ജോലിക്ക് എത്താതിരുന്നതിനെത്തുടർന്ന് സഹപ്രവർത്തകർ ആശങ്ക അറിയിച്ചതോടെയാണ് അന്വേഷണം ആരംഭിച്ചത്. രണ്ടുവർഷത്തിലേറെ നീണ്ട അന്വേഷണത്തിനൊടുവിലാണ് നിർണായക വിധിയുണ്ടായത്.വിചാരണയ്ക്കിടെ ഭാര്യയുടെ മൃതദേഹം വെട്ടിനുറുക്കി മാലിന്യത്തിൽ ഉപേക്ഷിച്ചതായി നരേഷ് ഭട്ട് സമ്മതിച്ചിരുന്നു. എന്നാൽ ഭാര്യ ആത്മഹത്യ ചെയ്തതാണെന്നും മൃതദേഹം കണ്ടപ്പോൾ പരിഭ്രാന്തനായാണ് താൻ അങ്ങനെ ചെയ്തതെന്നുമായിരുന്നു അദ്ദേഹത്തിന്റെ വാദം. ഈ വിശദീകരണം ജൂറി അംഗീകരിച്ചില്ല.വീട്ടിൽനിന്ന് കണ്ടെത്തിയ തെളിവുകൾ, രക്തക്കറകളുമായി ബന്ധപ്പെട്ട ഫോറൻസിക് പരിശോധനകൾ, ഇന്റർനെറ്റ് തിരച്ചിൽ വിവരങ്ങൾ, നിരീക്ഷണ ക്യാമറ ദൃശ്യങ്ങൾ എന്നിവ പ്രോസിക്യൂഷൻ കോടതിയിൽ അവതരിപ്പിച്ചു.കൊലപാതകം നടന്നതായി കോടതി കണ്ടെത്തിയെങ്കിലും മമതയുടെ മൃതദേഹം ഇതുവരെ കണ്ടെത്താനായിട്ടില്ല. ദമ്പതികൾക്ക് ഒരു ചെറിയ മകളുമുണ്ട്.ആറാഴ്ചയോളം നീണ്ട വിചാരണയ്ക്കുശേഷമാണ് ജൂറി വിധി പ്രഖ്യാപിച്ചത്. 2027 മാർച്ച് 12-നാണ് ശിക്ഷ വിധിക്കുക. ഒന്നാം ഡിഗ്രി കൊലപാതകക്കുറ്റത്തിന് ജീവപര്യന്തം തടവുവരെ ലഭിക്കാം. മറ്റ് രണ്ട് കുറ്റങ്ങൾക്കും അധിക തടവുശിക്ഷ ലഭിക്കാൻ സാധ്യതയുണ്ട്. മമതയുടെ മൃതദേഹം കണ്ടെത്താനായില്ലെങ്കിലും കുറ്റക്കാരനെ നിയമത്തിന് മുന്നിലെത്തിക്കാൻ കഴിഞ്ഞത് നിർണായക നീതിനേട്ടമാണെന്ന് പ്രോസിക്യൂഷൻ പ്രതികരിച്ചു.
റിപ്പോർട്ട്: അനിൽ മറ്റത്തിക്കുന്നേൽ
