കോട്ടയം: നിയമവിദ്യാഭ്യാസം കേവലം ഒരു തൊഴില്‍ നേടുന്നതിനുള്ള പഠനമല്ലെന്നും നീതി, സമത്വം, സ്വാതന്ത്ര്യം, ഭരണഘടനാ മൂല്യങ്ങള്‍ എന്നിവ സംരക്ഷിക്കുന്ന ഉത്തരവാദിത്തമുള്ള പൗരന്മാരെ സൃഷ്ടിക്കുന്ന പ്രക്രിയയാണെന്നും മന്ത്രി റോജി എം. ജോണ്‍. കാണക്കാരി സിഎസ്‌ഐ കോളജ് ഫോര്‍ ലീഗല്‍ സ്റ്റഡീസിന്‍റെ എക്‌സലന്‍സിയ-26 ബിരുദദാന, കോഴ്‌സ് പൂര്‍ത്തീകരണ ചടങ്ങ് കോട്ടയം സിഎസ്‌ഐ റിട്രീറ്റ് സെന്‍ററില്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കോളജില്‍ ആരംഭിക്കുന്ന പുതിയ പിജി പ്രോഗ്രാം എല്‍എല്‍എം ക്രിമിനല്‍ ലോയുടെ ഉദ്ഘാടനവും മന്ത്രി നിര്‍വഹിച്ചു. സിഎസ്‌ഐ മധ്യകേരള മഹായിടവക ബിഷപ്പും കോളജ് മാനേജരുമായ മലയില്‍ സാബു കോശി ചെറിയാന്‍ അധ്യക്ഷത വഹിച്ചു. പഞ്ചവത്സര ബിഎ എല്‍എല്‍ബി (ഓണേഴ്‌സ്), ബികോം എല്‍എല്‍ബി (ഓണേഴ്‌സ്), ത്രിവത്സര എല്‍എല്‍ബി കോഴ്‌സുകളുടെ പഠനം പൂര്‍ത്തിയാക്കിയ വിദ്യാര്‍ഥികള്‍ക്ക് സര്‍ട്ടിഫിക്കറ്റുകളും അവാര്‍ഡുകളും വിതരണം ചെയ്തു. എംജി സര്‍വകലാശാല രജിസ്ട്രാര്‍ ഡോ. ബിനു ജോര്‍ജ് വര്‍ഗീസ്, കോളജ് പ്രിന്‍സിപ്പല്‍ ഡോ. ജോര്‍ജ് ജോസഫ്, ബര്‍സാര്‍ കോശി ഏബ്രഹാം, സ്റ്റാഫ് അഡ്വൈസര്‍ ബോണി ജെ. കുര്യാക്കോസ്, വൈസ് പ്രിന്‍സിപ്പല്‍ ഡോ. ജെയ്‌സി കരിങ്ങാട്ടില്‍, ബിരുദധാരികളുടെ പ്രതിനിധികളായി ജെറീന എ. ജോഷ്വാ, ജെനിറ്റ ജോജോ, ജോ രാജ് എന്നിവര്‍ പ്രസംഗിച്ചു.
