മണര്കാട്: ഒരാഴ്ച നീണ്ട യാത്രാദുരിതത്തിനു വിരാമം. വെള്ളം ഇറങ്ങിയതോടെ മണര്കാട്-ഏറ്റുമാനൂര് ബൈപാസില് വാഹനങ്ങള് ഓടിത്തുടങ്ങി. ഇതോടെ മെഡിക്കല് കോളജ് ഉള്പ്പെടെയുള്ള സ്ഥലങ്ങളിലേക്ക് പോകേണ്ടവര്ക്ക് ആശ്വാസമായി. ശക്തമായ മഴയില് ബൈപാസിലെ പാലമുറി, നാലുമണിക്കാറ്റ്, പൂവത്തുംമൂട്, പേരൂര് ഭാഗങ്ങളില് വെള്ളം കയറിയതോടെയാണ് പോലീസ് കണിയാംകുന്നില് ബാരിക്കേഡ് സ്ഥാപിച്ച് ദിവസങ്ങള്ക്കു മുമ്പു ഗതാഗതം തടഞ്ഞത്. ഇതോടെ മെഡിക്കല് കോളജ് ഭാഗത്തേക്കും മറ്റും പോകേണ്ടവര്ക്ക് കോട്ടയം ടൗണ് വഴിയോ അയര്ക്കുന്നം-കിടങ്ങൂര് റോഡിലൂടെയോ കിലോമീറ്ററുകള് അധികം സഞ്ചരിക്കേണ്ടി വന്നിരുന്നു. നീലകണ്ഠപ്പടി, തിരുവഞ്ചൂര് ഭാഗവും ഒറ്റപ്പെട്ടു. മഴ ശമിച്ചതോടെ റോഡിലെ വെള്ളം താഴുകയായിരുന്നു. ഇതോടെ വെള്ളിയാഴ്ച ബൈപാസ് വീണ്ടും ഗതാഗതത്തിനായി തുറന്നുനല്കി. നാലുമണിക്കാറ്റിന്റെ വശങ്ങളില് ഇപ്പോഴും വെള്ളം കെട്ടിനില്ക്കുന്നുണ്ടെങ്കിലും ഇത് ഇന്നോടെ പൂര്ണമായി ഇറങ്ങുമെന്ന പ്രതീക്ഷയിലാണ് നാട്ടുകാര്. റോഡ് തുറന്നതോടെ വൈകുന്നേരങ്ങളില് വിശ്രമിക്കാനും സമയം ചെലവഴിക്കാനുമായി നാലുമണിക്കാറ്റിലെത്തുന്നവരുടെ എണ്ണവും കൂടി. വെള്ളപ്പൊക്കത്തിന്റെ നാളുകള് പിന്നിട്ട്, മണര്കാട് പതിയെ പഴയ തിരക്കിലേക്ക് മടങ്ങുകയാണ്.
