വാൻകൂവർ,കാനഡ : വേൾഡ് മലയാളി കൗൺസിൽ (WMC) വാൻകൂവർ പ്രൊവിൻസ് സ്ഥാനാരോഹണ ചടങ്ങും അവാർഡ് നിശയും വിപുലമായ ജനപങ്കാളിത്തത്തോടെയും ആഘോഷപൂർവവുമായ അന്തരീക്ഷത്തിലും നടന്നു. സമൂഹത്തിലെ പ്രമുഖർ, അംഗങ്ങൾ, സ്പോൺസർമാർ, വിവിധ സംഘടനകളുടെ പ്രതിനിധികൾ എന്നിവർ പങ്കെടുത്ത ചടങ്ങ് ശ്രദ്ധേയമായി. വേൾഡ് മലയാളി കൗൺസിൽ ഗ്ലോബൽ പ്രസിഡന്റ് ഡോ. ബാബു സ്റ്റീഫൻ ഔദ്യോഗികമായി വാൻകൂവർ പ്രവിശ്യ ഉദ്ഘാടനം ചെയ്തു. തുടർന്ന് അമേരിക്ക റീജിയൻ പ്രസിഡന്റ് ബ്ലെസൺ മണ്ണിൽ പുതിയ ഭാരവാഹികൾക്ക് സത്യപ്രതിജ്ഞ ചൊല്ലിക്കൊടുത്തു. അമേരിക്ക റീജിയൻ വിമൻസ് ഫോറം പ്രസിഡന്റ് ലക്ഷ്മി പീറ്റർ ആശംസപ്രസംഗം നടത്തി.
ലിറ്റി ജോർജ് പ്രസിഡന്റായും, അനി ഫിലിപ്പ് ചെയർപേഴ്സണായും, ഉല്ലാസ് മാത്യു സെക്രട്ടറിയായും നേതൃത്വം നൽകുന്ന പുതിയ പ്രവിശ്യാ കമ്മിറ്റി ചടങ്ങിൽ ഔദ്യോഗികമായി സ്ഥാനമേറ്റു. സുനിൽ തോമസ് (ട്രഷറർ), ജോജോ കുര്യൻ (വി.പി. ഓർഗ്), പ്രിസ്കില്ല ഓമ്മൻ (ജോയിന്റ് സെക്രട്ടറി), റോഷിൻ റോയ് (ജോയിന്റ് ട്രഷറർ), ആൽബിൻ ജോർജ് (വി.പി. അഡ്മിൻ), ജോർജ് വർഗീസ്, നീന ചെറിയാൻ, സജ്ന കരീം, സനൽ ജോൺ, അനൂപ് രാജശേഖരൻ, ജെയിംസ് തെക്കേക്കര എന്നിവർ ഉൾപ്പെടെയുള്ള ഭാരവാഹികളും സ്ഥാനമേറ്റു. “വാൻകൂവർ പ്രവിശ്യയുടെ രൂപീകരണവും സ്ഥാനാരോഹണവും വേൾഡ് മലയാളി കൗൺസിലിന്റെ ആഗോള വളർച്ചയിലേക്കുള്ള മറ്റൊരു സുപ്രധാന ചുവടുവയ്പ്പാണ്. ഉത്തര അമേരിക്കയിലെ മലയാളി സമൂഹത്തെ കൂടുതൽ ശക്തിപ്പെടുത്തുന്നതിൽ ഈ പ്രവിശ്യ നിർണായക പങ്ക് വഹിക്കുമെന്ന് പ്രതീക്ഷിക്കുന്നു,” ജെയിംസ് കൂടൽ പറഞ്ഞു.
ചടങ്ങിന്റെ അവസാനം, മലയാളി സമൂഹത്തിന്റെ ക്ഷേമത്തിനും ഡബ്ല്യു.എം.സി യുടെ ലക്ഷ്യങ്ങൾക്കും മൂല്യങ്ങൾക്കും അനുസൃതമായി പ്രവർത്തിക്കുമെന്ന് പുതിയ പ്രവിശ്യാ നേതൃത്വം പ്രതിജ്ഞാബദ്ധത അറിയിച്ചു.
