റോം: ഈ മാസം 20 മുതൽ 24 വരെ റോമിൽ നടക്കുന്ന കത്തോലിക്ക കോൺഗ്രസ് ഗ്ലോബൽ മീറ്റിൽ ഡൽഹിയിൽ നിന്നും ഡോ. കെ.സി. ജോർജും ജോബി ജോർജ് നീണ്ടുകുന്നേലും പങ്കെടുക്കും. 44 രാജ്യങ്ങളിൽ നിന്നായി 150-ലധികം പ്രതിനിധികൾ പങ്കെടുക്കുന്ന ഈ ആഗോള സംഗമം സീറോമലബാർ വിശ്വാസസമൂഹത്തിന്‍റെയും അൽമായ നേതൃത്വത്തിന്‍റെയും അന്താരാഷ്ട്ര തലത്തിലുള്ള പ്രധാന കൂടിക്കാഴ്ചയായിരിക്കും. സമ്മേളനത്തിൽ പങ്കെടുക്കുന്ന പ്രതിനിധികളുമായി ഒക്ടോബർ 22-ന് ലെയോ പതിനാലാമൻ മാർപാപ്പ കൂടിക്കാഴ്ച നടത്തും. സീറോമലബാർ സഭയിലെ അൽമായരുടെ സംഘടനയായ കത്തോലിക്ക കോൺഗ്രസ്, സഭയുടെ അൽമായ പ്രവർത്തനങ്ങൾക്ക് ശക്തമായ നേതൃത്വം നൽകിവരുന്ന സംഘടനയാണ്. മേജർ ആർച്ച്ബിഷപ് മാർ റാഫേൽ തട്ടിലിന്‍റെ നേതൃത്വത്തിലും ബിഷപ് ലെഗേറ്റ് മാർ റെമിജിയൂസ് ഇഞ്ചനാനിയുടെ മാർഗനിർദേശത്തിലും സീറോമലബാർ സഭയിലെ മറ്റ് സീനിയർ ബിഷപ്പുമാരുടെ സഹകരണത്തോടെയുമാണ് കത്തോലിക്ക കോൺഗ്രസ് പ്രവർത്തിക്കുന്നത്. പരിപാടിയിൽ പങ്കെടുക്കുന്നതിൽ ഏറെ സന്തോഷവും പ്രതീക്ഷയുമുണ്ടെന്ന് ഡോ. കെ.സി. ജോർജും ജോബി നീണ്ടുകുന്നേലും അറിയിച്ചു. വിശ്വാസം, സ്നേഹം, സേവനം, സാമൂഹിക ഉത്തരവാദിത്വം എന്നിവയുടെ സന്ദേശം കൂടുതൽ ശക്തമായി ലോകത്തിനു മുന്നിൽ അവതരിപ്പിക്കുന്നതിനും വിവിധ രാജ്യങ്ങളിൽ നിന്നുള്ള കത്തോലിക്കാ പ്രതിനിധികളുമായി ആശയവിനിമയം നടത്തുന്നതിനും ഈ സംഗമം സഹായകരമാകുമെന്ന് അവർ പ്രത്യാശ പ്രകടിപ്പിച്ചു.
മാർപാപ്പയെ നേരിൽ കാണാൻ കഴിയുമെന്നത് സംഘത്തിന് പ്രത്യേക ആത്മീയ അനുഭവമായിരിക്കുമെന്ന് ഇരുവരും പറഞ്ഞു. പരിശുദ്ധ പിതാവിന്‍റെ ആരോഗ്യത്തിനും പൂർണമായ സൗഖ്യത്തിനുമായി ലോകമെമ്പാടുമുള്ള വിശ്വാസികൾ നടത്തിയ പ്രാർഥനകളുടെ പശ്ചാത്തലത്തിൽ, അദ്ദേഹത്തെ നേരിൽ കാണാനുള്ള അവസരത്തെ വലിയ കൃതജ്ഞതയോടെയും പ്രതീക്ഷയോടെയും ആണ് സംഘം കാണുന്നത്. ലോകത്തിന്‍റെ വിവിധ രാജ്യങ്ങളിൽ നിന്നുള്ള പ്രതിനിധികൾ ഒത്തുചേരുന്ന ഈ സംഗമം, സഭയുടെ ദൗത്യത്തിൽ അൽമായരുടെ പങ്കാളിത്തം കൂടുതൽ ശക്തിപ്പെടുത്തുന്നതിനും സാമൂഹിക നീതി, കുടുംബം, യുവജനങ്ങൾ, മനുഷ്യാവകാശങ്ങൾ, സമാധാനം, സേവനം തുടങ്ങിയ മേഖലകളിൽ അന്താരാഷ്ട്ര സഹകരണം വർധിപ്പിക്കുന്നതിനും പുതിയ വഴികൾ തുറക്കുമെന്നാണ് പ്രതീക്ഷ.
