ബംഗളൂരു: തെരഞ്ഞെടുപ്പ് മുഖ്യ കമ്മീഷണർ ഗ്യാനേഷ് കുമാറിനെതിരായ ജന്തർ മന്തർ സമരത്തിനു മുന്നോടിയായി ബംഗളൂരുവില്‍ പ്രതിഷേധ റാലി നടത്തി സിജെപി. നടന് പ്രകാശ് രാജ്, യൂട്യൂബര് ധ്രുവ് റാത്തി, എസ്‌എഫ്‌ഐ നേതാവ് ഐഷി ഘോഷ് തുടങ്ങിയവര് പങ്കെടുത്തു. പ്രധാനമന്ത്രി നരേന്ദ്ര മോദി ജനാധിപത്യത്തെ കശാപ്പ് ചെയ്തുവെന്നും വോട്ട് മോഷണം നടത്തിയെന്നും സിജെപി നേതാവ് അഭിജീത് ദീപ്കെ ആരോപിച്ചു. ജനവികാരം മാറുന്നത് മോദി തിരിച്ചറിഞ്ഞിട്ടുണ്ട്. അതു വോട്ടിംഗില്‍ പ്രതിഫലിക്കുമെന്ന് അവർ ഭയപ്പെടുന്നു. അതുകൊണ്ടാണ് തങ്ങള്‍ക്കു കിട്ടാത്ത വോട്ടുകള്‍ കൂട്ടത്തോടെ ഒഴിവാക്കുന്നതെന്നും അദ്ദേഹം കൂട്ടിച്ചേർത്തു. “ഒരു രാജ്യം, ഒരു തെരഞ്ഞെടുപ്പ്’ എന്നത് ഒരു മുദ്രാവാക്യം മാത്രമാണ്. അതിനു പിന്നിലുള്ളത് ഗൂഢലക്ഷ്യങ്ങളാണ്. ബിജെപി ലക്ഷ്യമിടുന്നത് ‘ഒരു രാജ്യം, ഒരു പാർട്ടി’ എന്ന അവസ്ഥയ്ക്കാണ്. ഹിറ്റ്ലറും ഈ ലക്ഷ്യം വച്ചാണ് പ്രവർത്തിച്ചത്. ഹിറ്റ്ലർക്ക് എന്തു സംഭവിച്ചു എന്ന് ഓർക്കുന്നത് നല്ലതാണെന്നും അഭിജീത് കൂട്ടിച്ചേർത്തു. അതേസമയം, ഗ്യാനേഷ് കുമാറിനേക്കാള്‍ വലിയ വഞ്ചകൻ വേറെയില്ലെന്ന് യൂ ട്യൂബർ ധ്രുവ് റാത്തി പറഞ്ഞു. ഇത് തന്റെ ആദ്യ പ്രതിഷേധ സമരമാണെന്നും താൻ ഇവിടെ എത്തിയത് സർക്കാരിനെ മാറ്റാനല്ലെന്നും അദ്ദേഹം കൂട്ടിച്ചേർത്തു. വോട്ട് മോഷണം എന്നത് ഒരു യാഥാർഥ്യമാണ്. അതിനുള്ള തെളിവുകള്‍ തന്റെ പക്കലുണ്ടെന്നും ധ്രുവ് റാത്തി പറഞ്ഞു. ഇതു രാജ്യത്തിന്റെ നട്ടെല്ല് തകർക്കുന്നതിനെതിരായ പോരാട്ടമാണെന്നും അറസ്റ്റ് ചെയ്ത് തോല്‍പ്പിക്കാമെന്ന് കരുതേണ്ടെന്നും എസ്‌എഫ്‌ഐ നേതാവ് ഐഷി ഘോഷ് പറഞ്ഞു.
