ഇന്ത്യൻ പൗരന്മാർക്ക് ജർമ്മൻ വിമാനത്താവളങ്ങൾ വഴി മൂന്നാമതൊരു രാജ്യത്തേക്ക് യാത്ര ചെയ്യുമ്പോൾ ഇനി എയർപോർട്ട് ട്രാൻസിറ്റ് വിസ ആവശ്യമില്ലെന്ന് ഇന്ത്യയിലെ ജർമ്മൻ എംബസി ചൊവ്വാഴ്ച അറിയിച്ചു. ഇന്നലെ മുതൽ ഈ ഇളവ് പ്രാബല്യത്തിൽ വന്നു. ജർമനിയുടെ ഈ നീക്കം ഇന്ത്യൻ പൗരന്മാരുടെ യാത്ര ഈ ലളിതമാക്കാൻ സഹായിക്കുമെന്ന് എംബസി പ്രസ്താവനയിൽ പറഞ്ഞു. ഇരുരാജ്യങ്ങളും തമ്മിൽ വളർന്നു വരുന്ന പങ്കാളിത്തത്തിന്റെ പ്രതിഫലനമാണ് ഈ തീരുമാനമെന്നും എംബസി വിശേഷിപ്പിച്ചു. “ജർമ്മൻ-ഇന്ത്യൻ ബന്ധം ആഴത്തിലാക്കാനും ജനങ്ങളുടെ സുഗമമായ യാത്ര സാധ്യമാക്കാനും സാമ്പത്തിക ബന്ധങ്ങൾ കൂടുതൽ ശക്തിപ്പെടുത്താനുമുള്ള ഫെഡറൽ ഗവൺമെന്റിന്റെ പ്രതിബദ്ധതയെ ഇത് അടിവരയിടുന്നു,” പ്രസ്താവനയിൽ എംബസി കൂട്ടിച്ചേർത്തു.
യൂറോപ്പ്, വടക്കേ അമേരിക്ക തുടങ്ങിയ മറ്റ് പ്രദേശങ്ങളിലെ ലക്ഷ്യസ്ഥാനങ്ങളിലേക്ക് പോകുന്നതിനായി ജർമ്മൻ വിമാനത്താവളങ്ങളെ ട്രാൻസിറ്റ് ഹബ്ബുകളായി ഉപയോഗിക്കുന്ന വിദ്യാർത്ഥികൾ, പ്രൊഫഷണലുകൾ, ബിസിനസ്സ് യാത്രക്കാർ, വിനോദസഞ്ചാരികൾ എന്നിവരുൾപ്പെടെ ആയിരക്കണക്കിന് ഇന്ത്യൻ യാത്രക്കാർക്ക് ഈ നീക്കം പ്രയോജനം ചെയ്യുമെന്നാണ് പ്രതീക്ഷിക്കുന്നത്. ഈ വർഷം ആദ്യം ഫ്രാൻസ് സ്വീകരിച്ച സമാനമായ നടപടിക്ക് പിന്നാലെയാണ് ജർമ്മനിയുടെയും തീരുമാനം. ഫ്രാൻസ് വഴി വ്യോമമാർഗ്ഗം മാത്രം ട്രാൻസിറ്റ് ചെയ്യുന്ന ഇന്ത്യൻ പൗരന്മാർക്ക് ഇനി എയർപോർട്ട് ട്രാൻസിറ്റ് വിസ ആവശ്യമില്ലെന്ന് ഫ്രഞ്ച് സർക്കാർ ഫെബ്രുവരിയിൽ പ്രഖ്യാപിച്ചിരുന്നു; ഈ ഇളവ് 2026 ഏപ്രിലിൽ പ്രാബല്യത്തിൽ വന്നു.
ഫ്രാൻസിന്റെ നയമാറ്റത്തിന് മുമ്പ്, യുണൈറ്റഡ് സ്റ്റേറ്റ്സ്, കാനഡ, ജപ്പാൻ അല്ലെങ്കിൽ യൂറോപ്യൻ യൂണിയൻ അംഗരാജ്യങ്ങൾ തുടങ്ങിയ രാജ്യങ്ങളിലെ സാധുവായ വിസകളോ താമസ അനുമതികളോ (residence permits) കൈവശമുണ്ടെങ്കിൽ മാത്രമേ ഇന്ത്യൻ പൗരന്മാരെ എയർപോർട്ട് ട്രാൻസിറ്റ് വിസ നിബന്ധനയിൽ നിന്ന് ഒഴിവാക്കിയിരുന്നുള്ളൂ.
